Спортын төрөлжсөн “SPS HD” телевиз, “Монголын холимог тулааны урлагийн холбоо” хамтран 2019 оны 1-р сарын 26-ны бямба гаригт “АСА Цирк”-д “Mongol Fighting Championship” олон улсын тэмцээнийг анх удаа зохион байгуулах гэж байна. Энэ удаагийн тулаанд ОХУ-ын Бүгд Найрамдах Тува Улс болон Казахстанаас нийт 5 тулаанч ирж, холимог тулааны төрлөөр манай улсын тамирчидтай хүч үзэхээр болжээ.
Тулаанд оролцох тулаанчдаас цахим ертөнцөд “Ангууч” нэрээрээ танигдсан фото модель, тулаанч Б.Баттөр Казахстаны байлдааны самбо бөхийн хошой аварга Хабдулла Аллитай хийх тулаан олны анхаарлыг татаж байна. Хоёр тамирчин 66кг-ийн жинд хүч үзэх юм. Өчигдөр “Ангууч”-тай өрсөлдөх Хабдулла Али өөрийн цахим хуудсандаа ОХУ-ын тулаанч Хабиб Нурмагамедовын алдарт малгайг толгой дээрээ тавьж, энэхүү тулаанд бэлэн гэдгээ илэрхийлжээ.
Б.Баттөрийн хувьд 2017 онд “VTV” телевизийн “Мастер тулаанч” реалити шоугаар анх тулааны авьяасаа олонд харуулсан. Тэрээр холимог тулааны төрлөөр нийт 6 тулаан хийж, 4-т нь ялаад байгаа бөгөөд бүгдэд нь өрсөлдөгчөө хугацаанаас өмнө хүнд цохилтоор буулгаж байсан.
Харин түүнтэй өрсөлдөх Хабдулла Алигийн хувьд холимог тулааны төрлөөр 2 удаа тулалдаж, ялалт байгуулсан аж.
Mongol Fighting Championship” олон улсын тэмцээнд нийт 10 тулаан болно. Та бүхэн онц сонирхолтой тулаануудыг 1-р сарын 26-ны өдөр “АСА Цирк”-д хүрэлцэн ирж үзэх боломжтой юм.
