Нийслэлийн ИТХ-ын Тэргүүлэгчид өнөөдөр (2012.12.12-ны өдөр) хуралдаж найман асуудал хэлэлцлээ. Хуралдааны үеэр төрийн өмчөөс нийслэлийн, нийслэлийн өмчөөс төрийн өмчид хөрөнгө шилжүүлэх болон зарим эд хөрөнгийг нийслэлийн өмчид бүртгэх тухай асуудлыг хэлэлцэн, шийдвэрлэлээ. Уг асуудлыг нийслэлийн Өмчийн харилцааны газрын дарга Ч.Однасан танилцуулав.

УИХ-аас нийтдээ таван тэрбум 16 сая 958 мянган төгрөгийн өртөг бүхий эд хөрөнгийг төрийн өмчөөс нийслэлийн өмчид шилжүүлэхээр энэ онд 61 дүгээр тогтоол баталсан байдаг. Шилжүүлэхээр баталсан өмчид Баянзүрх дүүргийн XXVI хорооны нутагт байрлах "Үндэсний цэцэрлэгт хүрээлэн"-гийн хоёр га талбай дахь 2,655 метр зам, дугуйн зогсоол орж буй. Тус бүтээн байгуулалтын төсөвт өртөг нь гурван тэрбум 579 сая төгрөг.

Мөн тус хүрээлэнгийн 2.6 га талбай дахь 1.4 тэрбум төгрөгийн өртөг бүхий спорт цогцолборын бүтээн байгуулалт орж буй. Эл цогцолбор нь сагсан бөмбөг болон газрын теннисийн тус бүр гурав, хөлбөмбөгийн нэг талбайтай. Төрийн өмчөөс нийслэлийн өмчид шилжүүлж буй дараагийн хөрөнгө нь ЦЕГ-ын харьяа 805 дугаар ангийн эзэмшилд байсан, Баянзүрх дүүргийн XXII хороонд байрлах манааны байр юм. Уг байрны өртөг нь 7.8 сая төгрөг ажээ.

Харин нийслэлийн өмчөөс төрийн өмчид шилжүүлэх эд хөрөнгө өмч шилжүүлэх тухайд дурдвал, Гал түймэр унтраах, аврах 63 дугаар анги төвийн дулааны шугамд холбогдсон учир бүртгэлд байгаа халаалтын хоёр зуухыг ОБЕГ-т шилжүүлэх санал Баянзүрх дүүргийн Онцгой байдлын хэлтсээс ирүүлжээ. Зуух тус бүрийн өртөг нь 36.6 сая төгрөг аж. Харин ОБЕГ-аас цаашид ашиглах боломжтой дээрх хоёр зуухыг төрийн өмчид шилжүүлэх хүсэлт гаргасан байна.

Мөн 105 дугаар ангид ашиглаж буй шуурхай албаны "Старекс Ван" маркийн суудлын автомашиныг Дорноговь аймгийн онцгой байдлын газарт шилжүүлэх санал ирүүлжээ. Тус асуудлыг Тэргүүлэгчид хэлэлцээд тогтоол баталлаа. Мөн өнөөдрийн хуралдаанаар НОБГ-ын балансад бүртгэлтэй зарим өмчийг шилжүүлэх асуудлыг хэлэлцэв. Тус газраас 105 дугаар ангийнхны ашиглаж буй газар, уснаа явагчийг Увс аймгийн Онцгой байдлын газарт, Иргэдийг гамшгаас хамгаалах сургалт арга зүйн төвийн үйл ажиллагаанд ашиглаж буй газар хөдлөлтийг мэдрэх тавцан бүхий иж бүрэн тоноглолтой үзүүлэнгийн танхимыг тавилга, тоног төхөөрөмжийг Орхон аймгийн Онцгой байдлыг газарт шилжүүлэх санал ирүүлснийг хэлэлцэн шийдвэрлэв.

Түүнчлэн хуралдааны үеэр нийслэлийн өмчийн бүртгэлээс өмч хасах, шинээр эд хөрөнгө бүртгэх асуудлыг хэлэлцэв. Тодруулбал, Баянзүрх дүүргийн XXVII  хорооны өрхийн эмнэлэг болон цагдаагийн хэсгийн цогцолбор бүхий шинэ барилгыг ашиглалтад оруулсан. Үүнтэй холбогдуулан суурин дээр нь байсан 25.9 сая төгрөгийн өртөг бүхий "Андсайхан" ӨЭМТ-ийн барилгыг бүртгэлээс хасаж, 331.6 сая төгрөгийн өртөг бүхий шинэ барилгыг өмчид бүртгэж авах тухай санал нийслэлийн  Өмчийн харилцааны газраас орууллаа.

Мөн тус хорооны нутагт байрлах агуулахын хуучин барилгыг өмчийн бүртгэлээс хасаж,  хасах санал гаргав. Хөгжлийн банкны хөрөнгө оруулалтаар Баянгол дүүргийн XI хорооны нутаг, МҮОНРТ орчимд барьж, ашиглалтад оруулсан 296.2 сая төгрөгийн өртөг бүхий ус, дулаан дамжуулах төвийн барилга, тоног төхөөрөмж, Налайх дүүргийн нутаг дахь "Барилгын материалын үйлдвэрлэл, технологийн парк" ОНӨТҮГ-ын эзэмшилд газарт барьж, ашиглалтад оруулсан 9.8 сая  өртөг бүхий автомашины гурван гарааш, нийслэл болон дүүргийн орон нутгийн хөгжлийн сангийн хөрөнгөөр Сонгинохайрхан, Чингэлтэй дүүрэгт барьсан ус түгээх хоёр байрыг нийслэлийн өмчид бүртгэх санал оруулсныг Тэргүүлэгчид хэлэлцэн баталлаа.

Нийслэлийн ИТХ-ын ХМОНХТ