Монгол Улсын Ерөнхий сайд, Монголын Шатрын холбооны ерөнхийлөгч Гомбожавын Занданшатарт Азийн Шатрын холбооны ерөнхийлөгч Султан Бин Халифа Аль-Нахъян баярын захидал ирүүлжээ. Тэрбээр Ерөнхий сайдаар сонгогдсонд нь чин сэтгэлийн баяр хүргээд, энэ үйл явдал нь зөвхөн Монголын ард түмэнд бус Азийн шатрын хамт олонд түүхэн, бахархам мөч болсныг онцлон дурдсан байна.
Захидалдаа тэрээр Г.Занданшатарыг төрд олон жил тууштай ажилласан, шатрын холбоог удирдан манлайлсан, стратегийн алсын хараатай, эх орондоо үнэнч, оюуны өндөр эрмэлзэлтэй удирдагч хэмээн үнэлжээ. Түүний удирдлага дор Монголын шатар дэлхийн тавцанд хүчтэй байр суурь эзэлж, шилдэг тамирчид төрөн гарсныг дурдаад, энэ томилгоо нь ард түмэнтэйгээ нягт холбоотой, шударга, чадварлаг хүний баталгаа болохыг тэмдэглэжээ.
Түүнчлэн Г.Занданшатарыг шатрын тоглоомд хүндэтгэлтэй ханддаг нь зөвхөн Монголд бус бүс нутгийн хэмжээнд боловсрол, хүүхэд залуусын хөгжил, соёлын дипломат харилцаанд чухал нөлөө үзүүлдэг болохыг онцолжээ. Цаашид Азийн Шатрын холбоо Монголын Шатрын холбоотой улам ойр хамтран ажиллаж, тивийн хэмжээнд шатрын хөгжлийг дэмжинэ гэдгээ илэрхийлсэн байна.
Ерөнхий сайдын өндөр хариуцлагатай албанд нь амжилт хүсэж, баяр хүргэсэн энэхүү захидал нь Монголын шатрын хөгжил дэлхийн түвшинд хүрснийг батлах нэгэн тод жишээ болж байна.
