Ардчилсан намаас өнөөдөр /2026.06.25/ Сонгуулийн стратегийн байгууллагаа байгуулж, нэр дэвшигчдээ бүртгэж эхэлсэн талаар мэдээллээ.

Ардчилсан намын дарга О.Цогтгэрэл:

-"Ардчилсан намын Улс төрийн зөвлөл хуралдаж, 2028 оны УИХ-ын сонгуульд бэлтгэх ажлын хэсэг буюу сонгуулийн стратегийн байгууллагыг байгуулсан. Хоёр жилийн өмнөөс энэ ажлыг зохион байгуулах дүрмийн заалттай. Хоёр жилийн өмнөөс сонгуульд нэр дэвшигчдийнхээ сонирхлыг илэрхийлэх үйл ажиллагааг 2026 оны зургадугаар сарын 29-нөөс 10 хоногийн хугацаанд хийнэ. Өөрөөр хэлбэл, 2028 оны УИХ-ын сонгуульд нэр дэвших сонирхол бүхий гишүүд сонирхлоо илэрхийлэх юм. Энэ үйл ажиллагааг зохион байгуулах байгууллага нь 15 гишүүнтэй байхаар батлагдлаа. Сонгуулийн стратегийн байгууллагыг намын дарга удирдан зохион байгуулж ажиллана. Зохион байгуулалтыг штабын хэмжээнд хийж, ажиллана. Өдөр тутмын үйл ажиллагааг штабын дарга удирдаж ажиллах бөгөөд УИХ-ын гишүүн О.Амгаланбаатар ажиллана.

Ардчилсан намын хувьд, өнгөрсөн сонгуулиудаар тодорхой алдаа дутагдлууд гаргаж байсан учраас энэ удаа шударгаар үнэлэгдэж, нэр дэвшдэг систем рүү орж байна. Улс төрийн намын тухай хуулиар дэнчин авахыг хориглосон байгаа.

Төрийн сонгууль эхлэхэд хуулийн дагуу явж, тэр үедээ намын ЕНБД удирдаж ажиллана. Мөн Ерөнхийлөгчийн сонгуульд нэр дэвшигчийг нэр дэвшүүлэх журмыг баталсан. Тэр дагуу Сонгуулийн стратегийн байгууллага хариуцан, Ерөнхийлөгчийн сонгуульд нэр дэвших сунгаанд албан ёсоор орж байна. Олон улсын жишгийг нэвтрүүлж, албан ёсоор зохион байгуулалтын бүтцээ байгуулж байна гэсэн үг" гэв.