2026 оны Элсэлтийн шалгалт өчигдөр түүх, англи хэлний шалгалтаар эхэлж, өнөөдөр хими, газар зүй, нийгэм судлал зэрэг шалгалтаар үргэлжилж байна.
Шалгалтын явц болон олон нийтийн дунд үүсээд буй материал задарсан гэх асуудлын талаар Боловсролын яам, Боловсролын үнэлгээний төвөөс мэдээлэл өглөө. Энэ жил түүхийн хичээлээр улсын хэмжээнд 1320 суралцагч элсэлтийн шалгалт өгснөөс хоёр нь 800 оноо авсан байна. “Амгалан” цогцолборын сурагч О.Маргад, 24-р сургуулийн сурагч Э.Цэлмэг нар дээрх онооны эзэн болжээ. Англи хэлний хичээлээр 33201 суралцагч шалгалт өгөхөөр бүртгүүлснээс улсын хэмжээнд 95.2 хувийн ирцтэй гарчээ. Үүнээс 36 шалгуулагч 800 оноо авсан бөгөөд 100-100 буюу бүтэн оноогоо авсан гурван сурагч байна. Тодруулбал, 93-р сургуулийн сурагч Б.Сайнболд, 2-р сургуулийн сурагч Э.Шижир, “Улаанбаатар” сургуулийн сурагч Б.Амархүү нар юм. 800 оноо авсан суралцагчдыг аймаг, дүүргээр нь харвал Баянзүрхэд найм, Хан-Уулд зургаа, Баянголд тав, Сүхбаатарт гурав, Сонгинохайрханд хоёр, Орхон аймагт гурав, Завхан, Говьсүмбэр, Дархан-Уул, Төв, Хөвсгөлд нэг хүүхэд байна.
Боловсролын яамны Ерөнхий боловсролын бодлого зохицуулалтын газрын дарга Л.Ганбат “Түүхийн шалгалтад улсын хэмжээнд 1320 шалгуулагч хамрагдаж, дүн оноо нь гарсан. Элсэлтийн шалгалтад орж буй шалгуулагчдын сэтгэл зүйн эмзэг байдалд тулгуурлан зарим нэг ашиг хонжоо хайсан этгээд олон нийтийн цахим сүлжээнд буруу ташаа мэдээлэл түгээлээ. Тухайлбал, элсэлтийн шалгалтын сэдэв даалгавар задарсан, худалдаж байна, авсан, зарсан гэх буруу ташаа мэдээлэл тарааж байна. Элсэлтийн шалгалтын сэдэв даалгавар задрах ямар ч боломжгүй. 24 цагийн камер, холбогдох хууль хүчний байгууллагын мэргэжилтнүүдийн хатуу хяналтад сэдэв даалгавар боловсруулж, шалгалт зохион байгуулах өдөртөө шалгалтын төвүүдэд хуулийн байгууллагын тусламжтай хүргэдэг тул задрах ямар ч боломжгүйг хариуцлагатайгаар хэлье. Иймд элсэлтийн шалгалтын шалгуулагчид, эцэг эх, асран хамгаалагч, багш, иргэд олон нийтэд хандаж хэлэхэд буруу ташаа мэдээлэлд автаж, сэтгэл санаа, санхүүгээрээ хохирохгүй байхыг онцгойлон анхаарах хэрэгтэй” хэмээн ярилаа.
Харин БҮТ-ийн захирлын үүргийг түр орлон гүйцэтгэгч Э.Цэрэнцоодол “Өчигдөр зохион байгуулсан түүхийн шалгалтын сэдэвт дэлхийн түүхтэй холбоотой асуулт орж ирсэн талаар асууж байна. Бид элсэлтийн шалгалтын хичээл тус бүрийн агуулгын үндсэн чиглэл буюу блюпринтийг шалгалт зохион байгуулахаас өмнө олон нийтэд нээлттэй мэдээлдэг. Үүний дагуу энэ жилийн түүхийн шалгалтын блюпринтэд дэлхийн түүхүүдээс тодорхой хэмжээний агуулга ирнэ гэдгийг заасан байсан. Тиймээс энэ жилийн шалгалтад өгсөн блюпринтийн дагуу даалгаврууд орж ирсэн. Гэнэт шинэ агуулгаар шалгалт авсан зүйл байхгүй гэдгийг ойлгох хэрэгтэй. Бусад шалгалт ч блюпринтийн дагуу орж ирнэ” гэв.
Өнөөдөр болон бямба, ням гарагт зохион байгуулах элсэлтийн шалгалтад ирэхдээ шалгуулагчид материалаа үнэн зөв, бүрэн бүтэн авчрах, заасан цагаас хоцрохгүй байхыг холбогдох байгууллагаас санууллаа.
