Зургаадугаар сарын 16-ны өдрийн байдлаар Сэлэнгэ мөрөн Хялгант орчмоор, мөн Орхон гол Орхон болон Орхонтуул сумын нутаг дэвсгэрийг дайран урсах хэсгүүдэд усны түвшин өмнөх өдрөөс 20-30 см-ээр нэмэгджээ. Усны түвшний нэмэгдэл ойрын өдрүүдэд үргэлжилж, зургаадугаар сарын 17-ны өдөр Сэлэнгэ мөрөн Зүүнбүрэн, Орхон гол Сүхбаатар сум орчимд дахин 5-10 см-ээр нэмэгдэх төлөвтэй байна.

Энэ нь тухайн бүс нутагт богино хугацаанд их хэмжээний хур тунадас орох, мөн өндөр уулын цас хайлахтай холбоотойгоор гол мөрний усны түвшин нэмэгдэж буйг илтгэж байгаа юм. Иймд дээрх голуудын эрэг дагуу амьдардаг малчид, тариаланчид, аялж зугаалж яваа иргэд болон аж ахуйн нэгж, байгууллагууд үер усны аюулаас урьдчилан сэргийлэх, анхаарал болгоомжтой байх, бага насны хүүхдийг хараа хяналтгүй орхихгүй байх, аюултай бүсэд ойртон очихоос зайлсхийхийг холбогдох албанаас анхааруулж байна.

Мөн шаардлагатай тохиолдолд тухайн орон нутгийн Онцгой байдлын газар, багийн засаг дарга, цаг уурын анхааруулгын мэдээлэлд анхаарлаа хандуулан, өөрийн болон бусдын аюулгүй байдлыг хангахыг зөвлөж байна.

Эх сурвалж: Цаг уур, орчны шинжилгээний газар – Гадаргын усны судалгааны хэлтэс.