ЮНЕСКО-гийн Олон улсын ус зүйн хөтөлбөрийн 50 жил, Усны шинжлэх ухааны 60 жилийн ойн хүрээнд “Ус ба цөлжилт: Усны аюулгүй байдал ба уур амьсгалын өөрчлөлтийг даван туулах чадварыг бэхжүүлэх нь” сэдэвт олон улсын тусгай арга хэмжээг 2025 оны зургаадугаар сарын 12-ны өдөр Парис хотноо зохион байгууллаа. Уг арга хэмжээг Байгаль орчин, уур амьсгалын өөрчлөлтийн яам, Усны газар, Цөлжилттэй тэмцэх тухай НҮБ-ын конвенцын Талуудын 17 дугаар бага хурлын Бэлтгэл ажлын алба, Монгол Улсаас ЮНЕСКО-гийн дэргэд суугаа Байнгын төлөөлөгчийн газар хамтран санаачилсан байна.

Арга хэмжээг нээж Байгаль орчин, уур амьсгалын өөрчлөлтийн яамны Төрийн нарийн бичгийн дарга Ц.Уртнасан, Монгол Улсаас БНФУ-д суугаа Онц бөгөөд бүрэн эрхт Элчин сайд, ЮНЕСКО-гийн дэргэд суугаа Байнгын төлөөлөгч У.Нямхүү, мөн ЮНЕСКО-гийн Байгалийн шинжлэх ухааны асуудал эрхэлсэн Орлогч захирал Лидиа Артур Брито нар үг хэлэв. Тэд усны нөөцийн тогтвортой менежмент, уур амьсгалын өөрчлөлт, цөлжилтийн эсрэг хамтын ажиллагаа, түншлэлийн чухлыг онцолж байлаа.

Уг арга хэмжээнд ЮНЕСКО-гийн удирдлага, гишүүн орнуудын төлөөлөгчид, олон улсын байгууллагуудын мэргэжилтнүүд, усны салбарын судлаачид зэрэг тавин орчим зочин оролцож, санал солилцож, туршлага хуваалцсан нь олон улсын хамтын ажиллагааг гүнзгийрүүлэхэд бодит үр дүн үзүүлсэн гэж зохион байгуулагчид онцлов.

Монгол Улсын хувьд энэ арга хэмжээ нь зөвхөн олон улсын түншлэл, хамтын ажиллагаанд хувь нэмэр оруулаад зогсохгүй, 2026 онд Улаанбаатар хотноо зохион байгуулагдах Цөлжилттэй тэмцэх тухай НҮБ-ын конвенцын Талуудын 17 дугаар бага хурлын бэлтгэл ажлыг хангахад томоохон дэмжлэг болсон байна.