2025 оны тавдугаар сарын байдлаар Монгол орны ой, хээрийн түймрийн эрсдэлийн зураглал гарчээ. Үүнд нийт нутаг дэвсгэрийн 23.1 хувь нь бага, 7.4 хувь нь дунд, 5.4 хувь нь их, харин 6 хувь нь нэн эрсдэлтэй бүсэд хамаарч буйг судалгааны дүн харуулж байна. Энэхүү зураглалыг гаргахдаа сүүлийн 24 жилийн буюу 2000-2024 оны хооронд гарсан түймрийн голомтын байршил, давтамжийн давхцал, аюулын зэрэглэл, газрын бүрхэвчийн төлөв байдал болон 2025 оны тавдугаар сарын хуурайшилтын индекс зэргийг тооцон дүн шинжилгээ хийсэн байна.

Манай улсын нийт газар нутгийн 7.9 орчим хувь буюу 12.9 сая га талбай ойгоор бүрхэгддэг бөгөөд энэ нь гол төлөв Хөвсгөл, Сэлэнгэ, Булган, Хэнтий зэрэг хойд бүсийн аймгуудад төвлөрдөг. Эдгээр ой нь хар мод, нарс, хуш, гацуур зэрэг шилмүүст төрлөөс бүрдэх ба уур амьсгалын зохицуулалт, хөрс хамгаалах, усны эх үүсвэрийг тогтвортой байлгах, биологийн төрөл зүйлд амьдрах орчныг бүрдүүлэх зэрэг экологийн онцгой ач холбогдолтой.

Ой, хээрийн түймэр нь зөвхөн байгаль орчинд төдийгүй эдийн засаг, мал аж ахуй, хүний амьдралд хүнд үр дагавар учруулдаг. Иймд энэхүү эрсдэлийн зураглал нь урьдчилан сэргийлэх арга хэмжээг чиглүүлэх, хяналт, мониторингийн тогтолцоог сайжруулахад чухал хэрэглүүр болж байна.

Эх сурвалж: Байгаль орчин, аялал жуулчлалын яам