Монголын чөлөөт бөхийн холбоо /МЧБХ/-ны дасгалжуулагчдын Удирдах зөвлөл өнгөрсөн арваннэгдүгээр сарын 30-нд хуралдаж, 2019 оны зургадугаар сарын эхний долоо хоногт багтаан орон нутагт, насанд хүрэгчдийн чөлөөт бөхийн УАШТ-ийг зохион явуулахаар болжээ.
УАШТ-ийг өмнө нь нэгдүгээр сард зохион байгуулдаг байж. Энэ хуваарь нь ДАШТ-ээс ес, арван сарын өмнө болдог нь дасгалжуулагчдын толгойны өвчин байсан байна. Учир нь өвлийн гурван сар нь тамирчдын хувьд биеийн ерөнхий хөгжил болон хүчилтөрөгчийн бэлтгэлийн цонх үе байдаг аж. Иймээс зургадугаар сарын эхний долоо хоногт болгон шийдвэрлэжээ.
Үүнээс гадна МЧБХ сүүлийн хоёр жилд, ДАШТ-нд улсаа төлөөлөх тамирчдыг сорилгоор явуулдаг болсон хэдий ч, зарим туршлагатай мэргэжилтэн, дасгалжуулагчдын үзэж буйгаар дотооддоо сайн барилддаг тамирчин, дэлхийн аваргын дэвжээнд саар барилддаг тал ажиглагдсан байна. Энэ нь улсын шигшээ багийн амжилтыг ерөнхийд нь харвал учир дутагдал байна гэж үзэн, энэ сардаа багтан дасгалжуулагчдын зөвлөл дахин хуралдхаар болжээ. Тус хурлаар 2019 оны есдүгээр сард Казакстан улсын Астана хотод болох ДАШТ-нд оролцох шигшээ багийн тамирчдыг ямар журмаар сонгон шалгаруулахаа эцэслэн шийдэх юм байна.
Харин энэ 2019 оны УАШТ-ийг аль аймагт болох нь эцэслэн шийдэгдээгүй ба одоогоор Архангай аймаг, Багануур дүүрэг тус тус насанд хүрэгчдийн УАШТ-ийг, МЧБХ-той хамтран зохион байгуулах хүсэлтээ ирүүлээд байна.
