Завхан аймагт 2025 онд тусгай зориулалтаар нийт 43 толгой ан агнуулах эрхийг дуудлага худалдаагаар олгохоор болжээ. Засгийн газрын 2025 оны тавдугаар сарын 21-ний өдрийн 242 дугаар тогтоолд үндэслэн угалз 1, тэх 8, халиун буга 10, цагаан зээр 20, саарал чоно 4 толгойг агнуулах эрхийг зарласан байна.

Агнуурын бүс нутгаас тусгай зориулалттай агнуурын дуудлага худалдаанд оролцох бүртгэлийг зургаадугаар сарын 2-ноос 13-ныг хүртэл хүлээн авч, худалдааг цахимаар зургаадугаар сарын 17-нд 15:00 цагт зохион байгуулах юм. Бүртгэл болон материал хүлээн авалтыг Zavkhanboajg@gmail.com хаягаар хийж байна.

Босго үнэ дараах байдлаар тогтоогджээ:

• Угалз — 4,440,000₮

• Тэх — 1,060,000₮

• Халиун буга — 2,540,000₮

• Цагаан зээр — 199,400₮

• Саарал чоно — 226,000₮

Дуудлага худалдааны үнийг нэг удаа өсгөх доод хязгаар нь босго үнийн 10 хувь, дээд хязгаар нь 50 хувь байхаар тогтоосон. Харин дэнчин нь босго үнийн 10 хувь байна.

Өнгөрсөн онд Завхан аймаг 29 толгой ан агнуулах дуудлага худалдаа хоёр удаа зохион байгуулж, 12 амьтан агнуулсан байна. Энэ удаагийн худалдаанд ялсан оролцогч нь байгаль орчны газар болон агнуурын бүс нутгийн менежмент хариуцагч байгууллагатай гэрээ байгуулна.

Дуудлага худалдааны орлогоос:

• 50 хувийг Уур амьсгалын санд,

• 50 хувийг агнуурын менежментийн төлөвлөгөө хэрэгжүүлэхэд зарцуулдаг.

2023 онд 72.5 сая, 2024 онд 40.1 сая төгрөг төвлөрүүлж, байгаль хамгааллын судалгаа, хууль бус ан агнуураас урьдчилан сэргийлэх ажилд ашигласан байна.

Хууль бус ан агнуулах тохиолдолд тухайн амьтны экологи-эдийн засгийн үнэлгээг хоёр дахин нэмэгдүүлж нөхөн төлбөр ногдуулах бөгөөд эрүүгийн болон зөрчлийн хуулиар хариуцлага хүлээлгэнэ. Жишээлбэл:

• Халиун буга — 12,700,000₮

• Янгир — 5,300,000₮

• Аргаль — 22,200,000₮

• Цагаан зээр — 997,000₮

• Саарал чоно — 1,130,000₮

Харин ахуйн зориулалтаар агнуурын ховор зүйлээс бусад амьтныг тухайн сумын Засаг даргын зөвшөөрлөөр агнах боломжтой байдаг.

Эх сурвалж: Завхан аймгийн Байгаль орчны газар