Байгаль орчин, уур амьсгалын өөрчлөлтийн яам (БОУАӨЯ)-ны төлөөлөл Даян дэлхийн газрын санаачилга (Global Land Initiative, GLI)-ын Гүйцэтгэх захирал доктор Мурали Туммаракудиг хүлээн авч уулзлаа. Уулзалтын үеэр талууд Монгол орны цөлжилт, газрын доройтлыг бууруулах, нөхөн сэргээлтийн чиглэлээр хамтын ажиллагаагаа өргөжүүлэхээр санал нэгдсэн байна.

Уулзалтад оролцогчид газрын тогтвортой менежментэд суурилсан хамтын ажиллагааны бэлтгэл ажлыг эрчимжүүлэх, доройтлыг бууруулах, нөхөн сэргээх чадавхыг бэхжүүлэх чиглэлээр олон талт хамтын ажиллагааг хэрэгжүүлэхээр тохиролцжээ.

Хамтын ажиллагааны хүрээнд дараах ажлуудыг төлөвлөж байна. Үүнд:

• Нөхөн сэргээлтийн мэргэжилтэн бэлтгэх төв байгуулах;

• Их, дээд сургуулийн хөтөлбөрт нөхөн сэргээлтийн чиглэлийн сургалт оруулах;

• Хан Хэнтий, Говь-Алтай зэрэг бүс нутагт загвар төсөл хэрэгжүүлэх;

• G20-ийн шинжээчдийн оролцоотой судалгаа хийх;

• Цөлжилттэй тэмцэх тухай хуулийн төслийг боловсруулахад туршлага солилцох;

• Стартапуудыг олон улсын хөрөнгө оруулалт, хамтын сүлжээнд холбох;

• “Загвар НҮБ” хуралдаан, гэрэл зургийн уралдаан зохион байгуулж, шилдэг оролцогчдыг COP17 бага хуралд оролцуулах;

• 2026 онд Монгол Улсад зохион байгуулагдах UNCCD-ын Талуудын 17 дугаар бага хурлын үеэр “Land Restoration Pavilion” үзэсгэлэнг хамтран зохион байгуулах зэрэг юм.

Доктор Мурали Туммаракуди нь өмнө нь НҮБ-ын Байгаль орчны хөтөлбөрт (UNEP) ахлах мэргэжилтнээр ажиллаж, 35 гаруй орны нөхөн сэргээлтийн бодлого, байгаль орчны менежментийг удирдан ажиллаж байсан туршлагатай хэмээн мэдээлжээ.

Эх сурвалж: Байгаль орчин, уур амьсгалын өөрчлөлтийн яам