Улсын хэмжээнд 2025 оны зургаадугаар сарын 8-ны байдлаар Сэлэнгэ, Хөвсгөл, Булган аймагт ой, хээрийн дөрвөн түймрийн дуудлага бүртгэгдэж, мэргэжлийн байгууллагууд шуурхай ажиллаж байна.

Сэлэнгэ аймгийн Ерөө сумын Буурагчин II багийн “Их-Алт” гэх газар ойн түймэр гарсан тухай дуудлага Онцгой байдлын газарт зургаадугаар сарын 6-ны 21:30 цагт ирсэн байна. Дуудлагын дагуу тус аймгийн Онцгой байдлын газрын Мандал сум дахь Онцгой хэлтэс, Сүхбаатар сум дахь Гал түймэр унтраах, аврах 36 дугаар анги, Баянгол сум дахь 40 дүгээр анги, Сайхан сум дахь 61 дүгээр анги, Эрэн хайх, аврах ангийн алба хаагчид хамтран түймрийн голомтод ажиллаж байна.

Мөн Ерөө сумын Тавин багийн “Баруун сэнстэй” гэх газар аянга буусны улмаас ойн түймэр гарсан тухай дуудлага зургаадугаар сарын 7-ны 19:16 цагт бүртгэгдсэн. Түймрийн голомтод Ерөө сум дахь Цагдаагийн хэсэг, Засаг даргын Тамгын газар, Байгаль орчны хяналтын алба хаагчид ажиллаж байна.

Хөвсгөл аймгийн Цагаан-Үүр сумын Үүр II багийн “Хустын давааны ам” гэх газарт ойн түймэр гарсан дуудлага мөн өчигдөр буюу зургаадугаар сарын 7-ны 18:19 цагт бүртгэгдсэн. Тус сумын Байгаль хамгаалагчийн ахалсан 25 хүн, 25 морьтойгоор газар дээр нь ажиллаж, галын тархалтыг зогсоохоор хичээнгүйлэн ажиллаж байна.

Булган аймгийн Сэлэнгэ сумын Сангалтай багийн “Хандгайт Зүүн тарвагатай” гэх газарт ойн түймэр гарсан тухай дуудлага зургаадугаар сарын 7-ны 18:03 цагт хүлээн авсан. Булган аймгийн Хангал сум дахь Гал түймэр унтраах, аврах 50 дугаар анги, Сэлэнгэ аймгийн хилийн цэргийн 0243 дугаар ангийн 0281-р салбарын алба хаагчид түймрийг унтраахаар газар дээр нь ажиллаж байна.

Онцгой байдлын байгууллагууд болон нутгийн захиргааны байгууллагууд хамтран эдгээр түймрүүдийг бүрэн унтраахаар эрчимтэй ажиллаж байгаа бөгөөд иргэдийг байгаль хамгаалах, анхаарал болгоомжтой байхыг уриалж байна.

Эх сурвалж: Онцгой байдлын ерөнхий газар