Зам тээвэр хөгжлийн яамны газрын дарга асан, талийгаач Т.Гомбосүрэнгийн аав Р.Төмөрхуяг өмгөөлөгчийн хамт хэвлэлийн бага хурал зарлаж, хэргийн шалгалтын үйл явц болон Хууль зүй, дотоод хэргийн сайд Ц.Нямдоржид шаардлага хүргүүлэх болсон талаар мэдээлэл хийлээ.

ХЗДХ-ийн сайдад хугацаатай шаардлага хүргүүлнэ.

Талийгаачийн аав Р.Төмөрхуяг:

-Би хүүгийнхээ 49 хоног дээр анх мэдээлэл хийж байсан. Үүнээс хойш хоёр сарын хугацаа өнгөрлөө. Манай гэр бүлийн хувьд хүүгийнхээ ясыг өндөлзүүлж, өнөөдөр хэвлэлийн дахин бага хурал хийхээс өөр аргагүйд хүрлээ. Хууль хяналтын байгууллага хэргийг үнэн шударгаар шийднэ гэж бид итгэж хүлээсэн. Гэтэл бодсоноор болдоггүй юм байна. Шаардлагатай бүх нотлох баримтыг оролцуулалгүйгээр хэргийг шийдэх гээд байна. Мөрдөн байцаалтын ажиллагааг бүрэн явуулсангүй. Зарим нотлох баримт алга. Прокурор маш богино хугацаанд хэрэгтэй танилцаад бидэнд мэдэгдэлгүйгээр шүүхэд шилжүүлсэн байна. Б.Махбалыг бүр анхны зүйл ангиар нь, хамгийн хөнгөнөөр нь шийтгэх гэж байгааг бид ойлгохгүй байна. Зориуд санаатайгаар хүүгийн маань амь насыг онц хэрцгийгээр хөнөөсөн гэж үзэж байна. Энэ бодол санааг маань Зам тээврийн хөгжлийн дэд сайд асан Т.Цогтгэрэл саяхан нотлоод өгсөн. Ажлыг нь авахын тулд амь насыг хөнөөсөн гэдгийг дэд сайд нь нотлоод байхад цагдаа, прокурор хэрэгссэнгүй.

Миний хүү угаасаа хуульч хүн байсан. Би хүүгээ шударга, үнэнчээр ажиллаарай гэж л захидаг байсан. Бусад хүмүүс ч мөн манай хүүг шударга, үнэнч хүн гэж хэлдэг байсан. Энэ байдлаасаа болж амиа алдлаа. Хууль хяналтын байгууллагууд энэ хэргийн үнэн зөвийг олохгүй, тоглоом болгох гэж байгаад би их харамсаж байна. Тийм учраас би Хууль зүйн сайд Ц.Нямдоржид хугацаатай шаардлага хүргүүлэх гэж байна" гэлээ.

Хэргийг шийдвэрлэх гэж яарах нь хардлага төрүүлж байна

Өмгөөлөгч З.Хүрэлсүх:

-Есдүгээр сарын 28-ны өдөр энэ хэргийн талаар олон нийтийн дунд түгсэн буруу мэдээллийг арилгах зорилгоор бид хэвлэлийн бага хурал хийж байсан. Мөр зэрэгцэн ажиллаж байсан өмгөөлөгч нөхрийнхөө хэргийг үнэн зөв шийдэгдээсэй гэж хүсч байлаа. Хэрэг анхнаасаа тийм нууц далд байдалд үйлдэгдээгүй. Хуулийн дагуу шалгахад ээдрээ, түвэг үүсэх магадлал бараг байхгүй. Мөрдөн шалгах хугацаанд өмгөөлөгч нарын зүгээс олон хүсэлт, асуулт тавьсан. Заримд нь хариу илгээлгүй шүүхийн шатанд шилжүүлж байгааг хэвлэл мэдээллээс мэдлээ. Бидний зүгээс мөрдөн шалгах ажиллагааг нэмж явуулахыг санал тавьсан боловч хүлээн авсангүй.

Энэ хэргийг дүүргийн болон нийслэлийн хоёр прокурор дамжиж хянасан. Мөрдөн байцаах албаны мөрдөгч нар гурван шатаар дамжуулан мөрдөн шалгасан. Бид өнөөдөр мөрдөн байцаах баримт, мэдээллийг задруулах боломжгүй байна. Гэхдээ асуудлыг арай өөрөөр шийдэж байгаа нь хохирогчийн эрхийг хамгаалахгүй байна, прокурорын байгууллага хайнга хандаж байна. 

Хэргийг ажил албан тушаалтай нь холбогдуулан талийгаачийн амь насыг нь хөнөөсөн байх магадлал байгаа учир өмгөөлөгч нар бид энэ талын хүсэлтийг аравдугаар сард илгээсэн. Гэвч мөрдөн шалгах ажиллагаа явагдаж байна гэсэн шалтгаанаар хүлээн аваагүй. Гэтэл энэ хугацаандаа хэргийг шүүхэд шилжүүлсэн байгаа нь хэргийг шийдвэрлэх гэж хэт яарч байна гэсэн хардлагыг төрүүлж байна. Хохирогчийн эрхийг дахин хохироож байна" гэв.