Төв аймгийн Бүрэн сумын Засаг даргын Тамгын газар 2024 оны арваннэгдүгээр сард ажилтнуудын хүүхдэд зориулсан хүүхдийн өрөөг байгуулан ашиглалтад орууллаа. Тус өрөө нь төрийн байгууллагын ажилтнуудад хүүхдээ аюулгүй, тав тухтай орчинд үлдээж, илүү цагаар ч сэтгэл амар ажиллах боломжийг бүрдүүлж буйгаараа онцлог юм.
Хүүхдийн өрөөг байгуулах санаачилгыг Бүрэн сумын Иргэдийн Төлөөлөгчдийн Хурлын болон Засаг даргын Тамгын газрын албан хаагчид өөрсдөө гаргасан бөгөөд төсөв санхүүгийн асуудлыг шийдэхийн тулд хамт олноороо хужир бэлтгэн, борлуулж нийт 6 сая төгрөг цуглуулсан байна. Ийнхүү төрийн албан хаагчид нэгдэн өөрсдийн гараар бий болгосон энэхүү орчин нь зөвхөн хүүхдийн тав тухтай байдлыг хангаад зогсохгүй, эцэг эхчүүдийн сэтгэл санааг тогтвортой байлгаж, ажлын бүтээмжийг нэмэгдүүлж буйг онцолжээ.
Бүрэн сум нь нийт 3106 хүн амтай, 879 өрхтэй бөгөөд үүнээс 723 нь малчин өрх байдаг. Түүнчлэн 16-59 насны хөдөлмөр эрхэлдэг иргэдийн тоо 1816 байгаа нь сумын идэвхтэй ажиллах хүчний нөөц хангалттай, боловсон хүчний хэрэгцээтэй уялдан төрийн байгууллагын дотоод орчныг сайжруулах эрэлт байгааг харуулж байна.
Ажилтнуудын хүүхдэд зориулсан энэхүү өрөө нь орон нутгийн түвшинд төрийн албан хаагчдын нийгмийн асуудлыг шийдэх, бүтээлч санаачилгыг бодитоор хэрэгжүүлсэн сайн жишээ болж байгааг олон нийт сайшааж байна.
