Монголбанкны ерөнхийлөгч С.Наранцогт Санхүү банкны эмэгтэйчүүдийн холбооны удирдлагуудыг хүлээн авч уулзлаа.

Уулзалтын эхэнд тогтвортой хөгжил, ногоон санхүүжилтийн талаар Монголбанкнаас авч хэрэгжүүлж буй зарим бодлого, үйл ажиллагааныхаа талаар дэлгэрэнгүй мэдээлэл өгсөн байна. Эмэгтэй бизнес эрхлэгчдийг дэмжих, нэр томьёог нь ойлгомжтой тодорхойлох замаар зорилтот төслүүдэд хамрагдах боломжийг сайжруулах, банк, санхүүгийн үйлчилгээ авах нөхцөлийг нэмэгдүүлэх чиглэлд анхаарч ажиллаж байгаагийн дээр тус холбоотой бүх талаар хамтран ажиллахад нээлттэй гэдгийг Монголбанкны ерөнхийлөгч С.Наранцогт илэрхийлэв.

Цаашид бичил болон жижиг, дунд бизнес эрхлэгчдийн 80 гаруй хувь нь эмэгтэй бизнес эрхлэгчдийн оролцоотой байгааг харгалзан, санхүүгийн салбарын өртөмтгий байдлын судалгааг хийх, эмэгтэй бизнес эрхлэгчдийн санхүүгийн боловсролыг дэмжих, тэдэнд банк, санхүүгийн байгууллагуудаас тавьж буй нөхцөл, шаардлагыг уян хатан болгох, хөгжлийн бэрхшээлтэй иргэдэд чиглэсэн зорилтот төсөл, арга хэмжээнүүдийг хамтран хэрэгжүүлэх шаардлага бий гэдгийг ч мөн онцлов.

Харин Санхүү банкны эмэгтэйчүүдийн холбооны удирдлагуудын зүгээс зөвхөн банк, санхүүгийн салбарын эмэгтэйчүүдийн гэхээсээ илүү аль нэг хүйсийн давамгай байдлыг бий болгохгүйгээр жендерийн тэгш байдлыг хангах, эмэгтэй бизнес эрхлэгчдийн хөгжил, оролцоо, манлайллыг дэмжихэд чиглэсэн үйл ажиллагааг явуулж ирсэн талаараа танилцуулаад, 10 орчим жилийн өмнөөс анхаарч, шахаж шаардаж ирсэн зарим ажил эхнээсээ нийгмийн анхааралд өртөж бодит ажил хэрэг болж байна. Үүнд Төв банкны удирдлага, хамт олон дэмжлэг үзүүлж, тусгайлан анхаарч ажиллаж байгаад баяртай байна гээд удирдлагын түвшинд хүсэлтийг нь хүлээн авч, бодлого үйл ажиллагаагаа нээлттэйгээр танилцуулсанд талархлаа илэрхийллээ.