Хөвсгөл аймгийн Улаан-Уул сумын нутагт 2025 оны зургадугаар сарын 4-ний өдөр 18 цаг 22 минутад 5.3 магнитудын хүчтэй газар хөдлөлт болсон тухай Одон орон, геофизикийн хүрээлэн мэдээллээ. Одоогоор уг газар хөдлөлтөөс иргэдэд ямар нэгэн хохирол учирсан эсэх талаар Онцгой байдлын газрынхан тодруулга авч, нягталж байгаа юм.

Энэ нь 2025 он гарсаар Хөвсгөл аймгийн нутагт бүртгэгдсэн 3.5 магнитудаас дээш хүчтэй найм дахь удаагийн газар хөдлөлт бөгөөд бүс нутгийн тектоник идэвхтэй байдлыг дахин сануулж буй үйл явдал боллоо. Харин өнгөрсөн 2024 онд нийт 18 удаагийн газар хөдлөлт тус аймаг болон хил орчмын нутагт бүртгэгдэж байжээ.

Хөвсгөл аймаг газар хөдлөлтийн идэвхтэй бүсэд тооцогддог бөгөөд Ханх сумын нутагт 2021 оны нэгдүгээр сарын 12-нд 6.5 магнитудын хүчтэй хүчтэй газар хөдлөлт болсон нь сүүлийн арван жилд Монголд бүртгэгдсэн хамгийн хүчтэй газар хөдлөлтийн тоонд ордог. Мөн 1950 онд 6.8, 1985 онд 5.3 магнитудын чичирхийлэл болсон баримт байдаг.

Газар хөдлөлтийн хүчийг хоёр үндсэн үзүүлэлтээр хэмждэг. Магнитуд нь газар доорх чичирхийллийн төвд буй хүчийг илэрхийлдэг бол балл нь газрын гадаргуу дээр хэр мэдрэгдэж байгааг тодорхойлдог. Жишээлбэл, 1–3 баллын хүчтэй газар хөдлөлт нь маш ялимгүй мэдрэгддэг бол 6–7 баллын үед хүмүүс хөл дээрээ тогтоход бэрх болж, барилга байгууламж цуурч, шил хагарах зэрэг бодит хохирол үүсэх магадлал өндөр байдаг. Өнөөдрийн газар хөдлөлт 5.3 магнитудтай байсан нь дунд зэргийн хүчтэйд тооцогддог бөгөөд баллын хэмжилт нь тухайн орчны геологи, бүтэц, газар хөдлөлтийн гүндээс шалтгаалан янз бүр байж болно.

Хөвсгөл аймаг газар хөдлөлтийн 8 баллын идэвхтэй бүсэд багтдаг тул газар хөдлөлтийн аюулын талаарх мэдлэг, урьдчилан сэргийлэх бэлэн байдлыг тогтмол сайжруулах шаардлагатайг мэргэжилтнүүд онцолж байна.

Эх сурвалж: Одон орон, геофизикийн хүрээлэн, Хөвсгөл аймгийн ОБГ