Хөвсгөл аймгийн Алаг-Эрдэнэ сумын нутаг дэвсгэрт орших Эрхэл нуур орчимд хүрэн баавгай өчигдөр явж байхад нь нутгийн иргэдтэй таарсан тухай мэдээллийг Байгаль орчны газар өглөө. Энэ үйл явдлын дараа баавгайн явсан чиглэлийг тогтоох тандалт судалгааг холбогдох байгууллагаас хийж эхэлсэн байна.
Хөвсгөл аймаг нь байгалийн унаган төрхөө хадгалсан, ой мод ихтэй бүс нутаг бөгөөд хүрэн баавгай тус аймгийн Цагаан-Уул, Баянзүрх, Улаан-Уул, Цагааннуур, Рэнчинлхүмбэ, Ханх, Чандмань-Өндөр, Цагаан-Үүр, Эрдэнэбулган зэрэг 10 сумын нутагт өргөнөөр тархан амьдардаг болохыг судалгаагаар тогтоосон байдаг. Гэвч сүүлийн жилүүдэд баавгай уулаас бууж, хүн амьдрах бүс рүү ойртож ирэх тохиолдол нэмэгдэж байгаа тул аймгийн Байгаль орчны газар иргэдийг анхаарал болгоомжтой байхыг анхааруулж байна.
Тус аймаг жил бүр нэн ховор, ховор амьтдын тархац нутаг, амьдрах орчныг тогтоох, үнэлгээ өгөх судалгааны ажлыг байгаль хамгаалах нөхөн сэргээх сангаас төсөвлөж хийдэг. Тухайлбал, 2017 онд Түнэл, Чандмань-Өндөр, Цагаан-Үүр, Эрдэнэбулган, Тариалан сумдад хийсэн судалгаагаар нийт 1248.2 хавтгай дөрвөлжин км талбайд ойролцоогоор 600 хүрэн баавгай амьдарч байгааг “Аргаль агнуур судлалын төв” төрийн бус байгууллага тогтоожээ.
Хөвсгөлийн унаган байгаль нь хүрэн баавгайн амьдрах таатай орчин боловч хүн, малтай ойртох нь эрсдэлийг нэмэгдүүлж байгаа тул ууланд явах, мал хайн явах үед болгоомжтой байх шаардлагатайг мэргэжлийн байгууллага сануулж байна.
Эх сурвалж: Байгаль орчны газар
