Нийслэлийн Байгаль орчны газар энэ онд Хандгайт, Баруун салаа зэрэг зуслангийн бүсээс нийт 100 бодгаль монгол тарвагыг (Marmota sibirica) барьж, Зоонозын өвчин судлалын үндэсний төвийн түргэвчилсэн оношлуураар тарваган тахлын халдварыг шалган, эрүүл хэмээн баталгаажуулсны үндсэн дээр Баянзүрх дүүргийн 20 дугаар хорооны нутаг дэвсгэрт шилжүүлэн нутагшууллаа.

Тус газар 2017 оноос эхлэн тарвагыг буцаан байгальд нь нутагшуулах ажлыг тасралтгүй хийж ирсэн бөгөөд Санзай, Майхан толгой, Хуурай мухар, Шарга морьт зэрэг суурьшлын бүсээс нийт 286 тарвагыг Баянзүрх дүүргийн экосистемд зохистой бүсэд нутагшуулсан байна.

Сүүлийн жилүүдэд Улаанбаатар хот орчмын суурьшлын бүсийн тэлэлт, байгаль орчны доройтол, идэш тэжээлийн нөөц багасч буй нь тарвагыг хот суурин руу орж ирэхэд хүргэж байгаа аж. Тарвага нь айлын хашаанд идээшлэх, зэрлэгшсэн нохдод бариулах, хүний үйл ажиллагаатай ойртох эрсдэл нэмэгдсэнтэй холбоотой дуудлага, мэдээлэл ихээр бүртгэгдэх болсон нь энэхүү арга хэмжээг үргэлжлүүлэн хэрэгжүүлэх үндэслэл болсон юм.

Ийнхүү байгалийн амьтны тархац нутаг, амьдрах орчныг хамгаалах, халдварт өвчнөөс сэргийлэх, хүний амьдралтай зөрчилдөхөөс урьдчилан сэргийлэх зорилгоор тарвагыг байгальд нь буцаан нутагшуулах ажил үргэлжилж байна.

Эх сурвалж: Нийслэлийн Байгаль орчны газар