Ой, хээрийн түймрийн нөхцөл байдал хүндэрч буйтай холбогдуулан Улсын онцгой комиссын нарийн бичгийн дарга, хурандаа Т.Баярхүү болон Онцгой байдлын ерөнхий газрын Гал түймэртэй тэмцэх газрын дарга, хурандаа Ц.Нямбаяр нар цаг үеийн мэдээлэл хийлээ.

2025 оны тавдугаар сарын 30-ны өдрийн байдлаар улсын хэмжээнд 12 аймгийн 59 сум, нийслэлийн 3 дүүрэгт нийт 100 удаагийн ой, хээрийн түймэр бүртгэгдсэн нь өнгөрсөн оны мөн үетэй харьцуулахад 38 хувиар өссөн үзүүлэлттэй байна. Эдгээр түймрийн улмаас нийт 632 мянган га газар, 5 байшин, 49 гэр, 5 автомашин, 7 мотоцикл, 125 малын хашаа, 5937 бог, 470 бод мал, 7980 боодол өвс, 80 шуудай тэжээл шатаж, урьдчилсан дүнгээр 5 тэрбум төгрөгийн хохирол учраад байгаа юм.

Сүүлийн 10 хоногт Дорнод, Сэлэнгэ, Төв, Хөвсгөл, Хэнтий аймгуудад 10 удаагийн гал түймэр гарснаас 5-ыг бүрэн унтраасан бол үлдсэн 5 түймрийн голомтод унтраах ажиллагаа үргэлжилж байна. Үүнд:

• Сэлэнгэ аймгийн Ерөө, Мандал сумын Хэрийн гол,

• Хөвсгөл аймгийн Цагаан-Үүр сумын ойд гарсан түймрүүдийг цурамд оруулж, бүрэн унтраахаар ажиллаж байна.

• Харин Ерөө сумын Минжийн даваа, Батширээт сумын Бодончийн даваанд гарсан ойн галын голомтод шууд унтраах ажиллагаа зохион байгуулж байгаа юм.

Түймрийн голомтод ОБЕГ, Үндэсний аврах бригад, орон нутгийн Онцгой байдлын газар, хил хамгаалах болон байгаль орчны байгууллагууд, сумдын мэргэжлийн анги, иргэдээс бүрдсэн нийт 401 хүн, 27 автомашин, 17 морьтойгоор ажиллаж байна. Гал гарсан газруудын ихэнх нь автомашин очих боломжгүй, морин унаагаар 3-5 хоног туулж байж хүрдэг, хүндрэлтэй байршилд байгаа тул Зэвсэгт хүчний 303 дугаар ангийн МИ-171 нисдэг тэрэг, мөн ОБЕГ-ын харьяа 111 дүгээр ангийн агаарын тандалт, тээвэрлэлт хийж байна.

Ойрын өдрүүдэд ихэнх нутгаар хуурайшилтын зэрэг өндөр, галын аюул ихтэй байгаа тул иргэдийг:

• ой, хээрт зорчихгүй байх,

• хашаандаа өнжмөл өвс, хог хаягдал шатаахгүй байх,

• гал түймрийн аюулаас урьдчилан сэргийлэхэд онцгой анхаарахыг
  Онцгой байдлын байгууллагаас анхааруулж байна.

Эх сурвалж: ОБЕГ, УОК