Он гарсаар улсын хэмжээнд 12 аймгийн 59 сум, нийслэлийн гурван дүүрэгт нийт 98 удаагийн ой, хээрийн түймэр гарсан нь өнгөрсөн оны мөн үеэс 36.7 хувиар өссөн дүнтэй байна гэж ОБЕГ-ын Гал түймэртэй тэмцэх газрын дарга, хурандаа Ц.Нямбаяр мэдээллээ.

Эдгээр түймрийн улмаас урьдчилсан байдлаар:

• Ойн 65,768 га,

• Хээрийн 565,569 га,

• Нийт 631,337 га талбай шатаж,

• 5 байшин, 49 гэр,

• 5 автомашин, 7 мотоцикл,

• 125 малын хашаа,

• 5,937 бог, 470 бод мал,

• 7,980 боодол өвс, 80 шуудай тэжээл шатаж,
  ойролцоогоор 5 тэрбум төгрөгийн хохирол учраад байна.

2025 оны тавдугаар сарын 28-ны 11:00 цагийн байдлаар Сэлэнгэ, Булган, Хөвсгөл, Хэнтий аймгийн таван суманд 7 түймэр идэвхтэй байгааг ОБЕГ мэдээлэв. Эдгээрийг унтраахаар:

• ОБЕГ-аас 288 алба хаагч, 12 автомашин,

• Байгалийн тусгай хамгаалалттай газрын 151 хүн, 30 автомашин, 17 морь,

• Нийт 439 хүн, 42 автомашин, 17 морьтойгоор ажиллаж байна.

Сэлэнгэ аймгийн Ерөө сумын “Буурлын даваа”,
Булган аймгийн Сэлэнгэ сумын “Баруун голын даваа” дахь түймрүүдийг цурамд оруулж, бүрэн унтраахаар ажиллаж байгаа бол бусад таван түймрийг цурамд оруулахаар тэмцэж байна.

Мөн ОБЕГ-ын Урьдчилан сэргийлэх, олон нийттэй харилцах хэлтсийн дарга, хошууч Ш.Анхтуяа мэдээлэхдээ, тавдугаар сарын 29-нд “Аюулгүй байдлаа шалгах өдөр” тохиож байгааг санууллаа. Энэ хүрээнд:

• nema.gov.mn цахим хуудсанд иргэн, өрх, байгууллагад зориулсан

  • "Хяналтын хуудас",

  • "Аюулгүй өрх",

  • "Иргэний мэдлэг шалгах асуумж" нийтэлсэн байна.

Иргэн бүр ажил, амьдрах орчноо 2-3 минут зарцуулан үнэлж, эрсдэлийг тооцож, гамшгаас хамгаалах мэдлэгээ нэмэгдүүлэх нь өөрийн болоод гэр бүлийнхээ ирээдүйд хийж буй хамгийн үнэ цэнтэй хөрөнгө оруулалт гэдгийг ОБЕГ уриаллаа.

Эх сурвалж: ОБЕГ