Хаврын улирал манай орны хувьд цаг агаарын хувирамтгай байдлаараа онцлог бөгөөд энэ нь модлог ургамлын амьдрах нөхцөлд ноцтой сөрөг нөлөө үзүүлдэг. Ялангуяа Улаанбаатар хот орчмын бүсэд хаврын хуурайшилт, хүчтэй салхины нөлөө шилмүүст модонд түлэгдэх, үрэгдэх эрсдлийг нэмэгдүүлж байна. Агаарын чийгшил бага, хөрсөн дэх усны нөөц хангалтгүй үед модны үндэс чийг авах боломжгүй болж, өмнөх жилийн үлдэгдэл чийгээр амьдрахад хүрдэг.

Ийм нөхцөлд шилмүүс хатаж шарлах үзэгдэл буюу хаврын түлэгдэлт илэрдэг. Энэ нь гацуур, нарс, зарим төрлийн арц модонд түгээмэл тохиолддог. Цаг уур эрт дулаарах, намрын арчилгаа хангалтгүй байх нь түлэгдэлтийн үндсэн шалтгаан болдог байна.

Нөгөө талаас салхи нь модны чийгийг хамгийн ихээр хорогдуулж, бүхэл бүтэн биеийг нь хөдөлгөөнд оруулснаар стресс үүсгэдэг. Хүчтэй салхи нь модны мөчрийг хугалах, бүр үндсээр нь ховх татах эрсдэлтэй. Шилжүүлэн суулгасан модны хувьд салхины нөлөө ялангуяа анхны жилд аюултай бөгөөд тухайн мод шинэ орчиндоо бүрэн үндэсжиж амжаагүй үедээ салхинд байнга ганхсанаар үндэсний гэмтэлд орж улмаар үхэлд хүрэх эрсдэлтэй.

Иймд хаврын улиралд модыг хамгаалах хамгийн үр дүнтэй арга бол тулгуур бэхэлгээ ба хучлага хийх явдал юм. Ялангуяа 1.8 метрээс дээш өндөртэй модод заавал тулгууртай байх шаардлагатай. Бэхэлгээг хийхдээ олс, шургааг мод, эсвэл зориулалтын материал ашиглаж болох бөгөөд байнга шалгаж бат бөх байдалд нь анхаарах хэрэгтэй. Мөн энэ үед тогтмол усалгаа, хөрсний чийгийн хяналт, сүүдэрлэлт зэрэг арчилгааны ажлыг сайтар гүйцэтгэх нь чухал юм.

Эх сурвалж: Экологийн Цагдаагийн Алба