Нийслэлийн хэмжээнд ой, хээрийн түймрээс урьдчилан сэргийлэх ажлыг эрчимжүүлж, мэргэжлийн байгууллагуудын хамтарсан ногоон бүсийн хөдөлгөөнт эргүүлүүд хяналт, шалгалт хийж эхэллээ.

Энэхүү хамтарсан ажиллагаанд:

• Нийслэлийн Онцгой байдлын газар (НОБГ)

• Цагдаагийн удирдах газар

• Байгаль орчны газар тус бүр 6 албан хаагч,

• Богдхан уулын дархан цаазат газрын хамгаалалтын захиргаа 5 албан хаагч томилогдон оролцож байна.

Нийт 24 албан хаагч 5 автомашинтайгаар өдөр бүр 09:00–20:00 цагийн хооронд Баянзүрх, Сүхбаатар, Сонгинохайрхан, Хан-Уул, Чингэлтэй дүүргийн ногоон бүсийн орчимд эргүүл шалгалт хийж, түймрийн эрсдэлээс урьдчилан сэргийлэх чиглэлээр ажиллаж байгаа талаар Нийслэлийн Засаг даргын Тамгын газар мэдээллээ.

Хуурайшилт өндөртэй энэ үед иргэдийг ногоон бүсэд зорчихдоо ил гал хэрэглэхгүй байх, хог хаяхгүй байх, анхаарал болгоомжтой байх талаар сануулгыг эргүүлүүд газар дээр нь өгч, шаардлагатай тохиолдолд хариуцлага тооцох арга хэмжээ авна.

Эх сурвалж: НЗДТГ