Өнөөдөр дэлхий нийтээр “Биологийн олон янз байдлын олон улсын өдөр”-ийг “Байгальтай зохицсон, тогтвортой хөгжил” уриан дор тэмдэглэж байна. Жил бүрийн тавдугаар сарын 22-нд тохиодог энэ өдрийг НҮБ-ын Ерөнхий Ассамблей 2001 оны хоёрдугаар сарын 8-ны тогтоолоор зарлан тунхагласан бөгөөд хүний нийгэм байгаль орчноос хэт хамааралтай гэдгийг ойлгуулж, байгалийн баялаг, амьд биетний тэнцвэрт оршлыг хадгалахыг уриалдаг.

Биологийн олон янз байдал гэдэг нь зөвхөн амьтан, ургамал бус экосистем, бичил биетэн, тэдгээрийн амьдрах орчин, генетикийн түвшинд илрэх олон талт байдал зэрэг бүхэл бүтэн системийн цогц ойлголт юм. Энэ бол хүн төрөлхтний сайн сайхан ирээдүй, тогтвортой хөгжлийн үндэс хэмээн дэлхий нийтээр хүлээн зөвшөөрдөг.

НҮБ-ын Ерөнхий нарийн бичгийн дарга Антонио Гутерриш энэ өдрийг тохиолдуулан “Биологийн олон янз байдал бол амьдралын суурь, тогтвортой хөгжлийн тулгуур багана” гэж онцлон тэмдэглэжээ. Тэрээр богино хугацааны ашиг сонирхлоос болж байгаль орчны доройтол, уур амьсгалын өөрчлөлт, бохирдол нэмэгдэж байгааг анхааруулж, Кунмин–Монреалийн хүрээг хэрэгжүүлэх, ногоон эдийн засгийг хөгжүүлэх шаардлагатай хэмээн уриалсан байна.

Монгол Улсад энэ өдрийг тохиолдуулан Байгаль орчин, уур амьсгалын өөрчлөлтийн яамнаас биологийн олон янз байдлын үндэсний стратеги, төлөвлөгөөг танилцуулж, орон нутгийн иргэд, хүүхэд залуучуудад чиглэсэн сурталчилгаа, боловсролын болон соён гэгээрүүлэх арга хэмжээнүүд зохион байгуулж байна. Түүнчлэн олон нийтийн оролцоо, санал бодлыг тусган, байгаль хамгааллын төлөвлөлтийг сайжруулах зорилготой үйл ажиллагааг өрнүүлж байгаа аж.

Энэ өдөр бол зүгээр нэг тэмдэглэлт өдөр бус, хүн төрөлхтөн байгальтайгаа эвлэрч, уялдаа холбоотой амьдрах ухамсрыг нэмэгдүүлж, хойч үедээ эрүүл дэлхий үлдээх амлалтын өдөр билээ.

Эх сурвалж: НҮБ, Байгаль орчин, уур амьсгалын өөрчлөлтийн яам.