Улсын онцгой комисс болон Онцгой байдлын ерөнхий газраас ой, хээрийн болон объектын гал түймрийн нөхцөл байдлын талаар мэдээлэл хийлээ. ОБЕГ-ын мэдээлснээр 2025 он гарсаар өнөөдрийн байдлаар улсын хэмжээнд объектын гал түймрийн 2149 тохиолдол бүртгэгдсэн нь өнгөрсөн жилийн мөн үетэй харьцуулахад 32.5 хувиар өссөн үзүүлэлт болж байна.

Гал түймрийн шалтгааныг авч үзвэл:

• 64.6 хувь нь иргэдийн санамсар болгоомжгүй үйлдлээс

• 25 хувь нь цахилгааны аюулгүй байдлын зөрчлөөс

• 6.6 хувь нь шалтгаан тодорхойгүй

• 2 хувь нь техник ашиглалтын доголдлоос

• 1 хувь нь санаатай үйлдлээс

• 0.9 хувь нь бусад шалтгаантай байна

Объектын гал түймрийн 76.5 хувь нь хувийн өмчид, 15.9 хувь нь төрийн өмчид тохиолдсон бол газар зүйн байршлаар Нийслэлд 1437 удаа, 21 аймагт 712 удаа бүртгэгджээ. Үүнээс Сэлэнгэ, Дархан-Уул, Орхон, Төв аймагт түймрийн тоо хамгийн өндөр байгааг онцолсон байна.

Мөн ой, хээрийн гал түймэр 12 аймгийн 58 сум, Улаанбаатарын 3 дүүрэгт нийт 90 удаа бүртгэгдсэн нь өмнөх оныхоос 31.8 хувиар өссөн үзүүлэлттэй байна. Уг түймрүүдийн улмаас:

• 65 мянган га ой, 565 мянган га хээр, нийт 631 мянган га газар шатаж,

• 5 байшин, 49 гэр, 5 автомашин, 7 мотоцикл, 125 малын хашаа, 6400 гаруй мал, 8000 боодол өвс, 80 шуудай тэжээл өртжээ.

• Урьдчилсан байдлаар 5 тэрбум төгрөгийн хохирол учраад байна.

Гал түймрийн илрүүлэлтийн 5.5 хувийг олон улсын FIRMS болон ICC.mn сайтын хиймэл дагуулаас илрүүлсэн бол, Сэлэнгэ аймгийн Ерөө сумын “Хэрийн гол” гэх газарт тавдугаар сарын 21-нд шинэ дулааны цэг илэрсэн тухай мэдээлэл байна. Тус газарт холбогдох алба хаагчид ажиллаж эхэлжээ.

Ой, хээрийн бүс нутгуудад хуурайшилт өндөр хэвээр байгааг онцолж, гал түймрийн эрсдэл буураагүйг анхааруулсан бөгөөд иргэдийг байгальд явахдаа гал асаахгүй байх, ил задгай хаягдал шатаахгүй байх зэрэг урьдчилан сэргийлэх хариуцлагатай хандлага гаргахыг ОБЕГ-аас уриаллаа.

Эх сурвалж: УОК, ОБЕГ.