Завхан аймгийн Онцгой байдлын газар "Аврагч төгөл" нэртэй мод үржүүлгийн талбайдаа энэ хавар 200 мод, 2000 улиасны суулгац тарьжээ. Энэхүү ажил нь “Тэрбум мод” үндэсний хөдөлгөөнийг дэмжих хүрээнд хийгдсэн бөгөөд байгууллага 2022 оноос хойш тогтмол оролцож байна.

Тус байгууллага 2030 он хүртэл нийт 380 мянган мод тарих зорилт тавьсан бөгөөд үүний 30 мянгыг Онцгой байдлын алба хаагчид өөрийн эзэмшлийн хашаанд тарина. Жил бүрийн төлөвлөгөөнд нийт 43,750 мод тарих бөгөөд үүнээс 3750 нь алба хаагчдын хувийн орчинд таригдана.

Энэ хаврын мод тарих ажлын хүрээнд чацаргана, улиас зэрэг мод тарьсан бол өнгөрсөн амралтын өдөр Төв цэнгэлдэх хүрээлэнд 100 хайлаас мод суулгажээ. Өмнөх онд 7 төрлийн мод, жимсний бут бүхий 14,710 мод, суулгац тарьж байсан бол энэ жил 15 мянга орчмыг шинээр тарьж ургуулжээ.

Мөн цаашдын төлөвлөгөөнд:

• Гал түймэр унтраах, аврах 43-р анги, Эрэн хайх, аврах бүлэг 15,600 мод

• Улсын нөөцийн салбар 6,050 мод

• Тосонцэнгэл сумын хэлтэс болон Гал унтраах 39-р анги 10,450 мод

• Гал түймэр унтраах 57-р анги 9,375 мод

• Сонгино сумын эрэн хайх аврах бүлэг 2,200 мод тарихоор тус тус төлөвлөжээ.

Онцгой байдлынхан зөвхөн үүрэг гүйцэтгэхэд бус, экологийн тэнцвэрийг хангах, уур амьсгалын өөрчлөлтийн эсрэг тэмцэхэд чухал хувь нэмэр оруулж буйг тус газрын мэдээлэлд дурдсан байна.

Эх сурвалж: Завхан аймгийн Онцгой байдлын газар