Говийн их дархан цаазат газрын (ГИДЦГ) А хэсгийн хамгаалалтын захиргаа, “Ховор амьтан, ургамал хамгаалах мазаалай нийгэмлэг” төрийн бус байгууллагатай хамтран нэг бодгаль эр мазаалайд сансрын дохиолол бүхий хүзүүвч зүүж, түүний шилжилт хөдөлгөөн, зан төлвийг судлах ажил эхлүүлжээ.
2025 оны тавдугаар сарын 15-ны өдөр энэ ажлыг ГИДЦГ-ын А хэсгийн хамгаалалтын бүсэд багтах Баруунтооройн баянбүрдэд амжилттай хэрэгжүүлсэн байна. Хүзүүвч зүүсэн мазаалай нь ойролцоогоор 10 настай, 100 кг орчим жинтэй, эр хүйстэй бөгөөд эрдэмтдийн судалгаанд чухал ховор тохиолдох биет өгөгдөл болохоор байна.
Уг хүзүүвч нь GPS системтэй, сансрын дохиоллоор байршлын мэдээлэл дамжуулахын зэрэгцээ дүрс бичлэг хийх боломжтой технологитой бөгөөд мазаалайг байгаль дахь орчин нөхцөл, нутагшлын хүрээ, хөдөлгөөний замналыг нарийвчлан тандан судлах боломжийг олгож байгаа нь томоохон дэвшил хэмээн судлаачид онцолж байна.
Баруунтооройн баянбүрд нь Монгол Улсын хилээс ердөө 40 орчим км-ийн зайд оршдог бөгөөд говийн ховор амьтдын амьдрах чухал бүс нутгийн нэг юм. Энэхүү технологийн тусламжтайгаар мазаалай хамгааллын бодлогыг илүү үр дүнтэй, шинжлэх ухаанд суурилсан хэлбэрээр хэрэгжүүлэх боломж бүрдэж байна.
Эх сурвалж: ГИДЦГ-ын А хэсгийн хамгаалалтын захиргаа
