Сэлэнгэ аймгийн Түшиг сумын Ар нуга багийн “Ар шүрэн” гэх газарт тавдугаар сарын 1-ний өдөр гарсан ойн түймрийг өнөөдөр буюу тавдугаар сарын 13-ны 10:10 цагт бүрэн унтрааж, орон нутгийн удирдлагад хүлээлгэн өглөө.
Түймрийн голомтод Онцгой байдлын ерөнхий газар (ОБЕГ), Үндэсний аврах бригад, Агаараас эрэн хайх, аврах 111 дүгээр анги, Нийслэлийн Онцгой байдлын газар болон Сэлэнгэ, Орхон, Дархан-Уул, Өмнөговь, Дундговь, Говьсүмбэр, Баянхонгор, Дорноговь, Өвөрхангай аймгийн Онцгой байдлын газар, Цагааннуур сумын аврагчид, орон нутгийн иргэдийн хамтарсан 336 хүн, 33 техник хэрэгсэлтэйгээр шуурхай ажиллаж, олон өдрийн турш үргэлжилсэн түймрийг бүрэн унтраажээ.
Урьдчилсан тооцоогоор уг түймэрт 26,562.9 га талбай өртсөн байна. Түймрийн шалтгаан, хохирлын хэмжээ, нөхөн сэргээлтийн төлөвлөгөө зэрэг мэдээллийг холбогдох байгууллагууд нарийвчлан судалж, дараагийн арга хэмжээг авч хэрэгжүүлэх юм.
Эх сурвалж: Онцгой байдлын ерөнхий газар
