“Тэрбум мод” үндэсний хөдөлгөөний хүрээнд Булган аймагт “Бүх нийтээр мод тарих өдөр”-үүдийг тавдугаар сарын 9-11-нд амжилттай зохион байгуулж, байгаль орчинд хувь нэмэр оруулах ажил өрнөлөө.

Нээлтийн үеэр Булган аймгийн Засаг дарга Д.Пүрэв-Очир, Байгаль орчны газрын дарга А.Гантөмөр нар иргэд, аж ахуйн нэгж, байгууллагуудыг идэвх санаачилгатай оролцож, байгаль орчноо хамгаалах үйлсэд үнэтэй хувь нэмэр оруулахыг уриалсан юм.

Булган сумын хэмжээнд төр, төсвийн байгууллагууд нэгдсэн гурван байршилд мод тарих ажлыг зохион байгуулсан бөгөөд аймгийн хэмжээнд 2030 он хүртэл 20 сая ширхэг мод тарих зорилт тавин ажиллаж байна. 2025 оны байдлаар энэ зорилтын хүрээнд нийт 1 сая 962 мянга 245 ширхэг мод, бут тарьж ургуулсан байна.

Энэхүү ажлыг хэрэгжүүлэхдээ доройтсон ойг нөхөн сэргээх, цөлжилт, элсний нүүдлийг тогтоон барих, ногоон байгууламжийг нэмэгдүүлэх, тарьц суулгацын нөөцийг бүрдүүлэх, тарилтын ажлыг эрчимжүүлэх чиглэлээр үр дүнтэй арга хэмжээ авч хэрэгжүүлж байна.

Монгол Улсын Ерөнхийлөгчийн зарлигаар жил бүрийн тав болон есдүгээр сарын бямба, ням гарагийг “Тэрбум мод тарих үндэсний өдөр” болгон зарласныг дэмжиж, Булган аймгийн Боловсролын газрын хамт олон хамт олноороо идэвхтэй оролцож, 100 ширхэг мод суулгалаа.

Мөн Булган аймгийн Газрын харилцаа, хот байгуулалтын газрын хамт олон “Бүх нийтээр мод тарих өдөр”-т нэгдэж, хуваарьт газартаа бургас, хайлаас зэрэг мод тарьсан байна.

Энэхүү арга хэмжээ нь байгаль орчны тэнцвэрт байдлыг хадгалах, ирээдүйн хойч үедээ эрүүл ногоон орчин үлдээхэд чухал ач холбогдолтой үйл ажиллагаа боллоо.