Ус цаг уур, орчны судалгаа мэдээллийн хүрээлэнгээс ган зуншлага, цас зудтай холбоотой газрын ажиглалтын болон хиймэл дагуулын олон төрлийн мэдээгээр зудын эрсдлийг тодорхойлдог байна. Ховд аймгийн ус цаг уур орчны шинжилгээний газраас хийсэн зудын эрсдлийн үнэлгээгээр нийт нутгийн 70 орчим хувь нь зудын эрсдэлтэйд тооцогджээ.

Дээрх аймгийн зуншлага нийт нутгийн 10 орчим хувьд хэвийн, 70 орчим хувьд гандуу, 20 гаруй хувьд гантай байсан нь ургацын хэмжээ бага байх, мал тарга хүч дутуу авах, өвөл хаврын бэлчээрийн даац ихээхэн хэмжээгээр хэтрэх, бэлчээрийн нөөц хүрэлцээ муугаас үүдэлтэйгээр мал өвөлжилт хаваржилт хүндрэх нөхцөл бүрдэхэд хүргээд байна.

Цаашид цаг агаарын байдал муудаж цас орвол өвөлжилт хүндэрч болзошгүй. Хүйтний улирлын цаг агаарын төлөвийн мэдээгээр цаашид зарим газраар ахиу цас орох төлөвтэй байгаа нь зудын эрсдэлийг улам нэмэгдүүлэх, одоо дунд зэрэг эрсдэлтэй байгаа газар нутгаар өвөлжилтийн нөхцөл байдал муудаж, хүндэрч болзошгүй аж.

Ховд аймгийн нийт  79 багийн нутгаар бэлчээрийн даац, багтаамжийн хэмжээг тодорхойлсон байдлаас харахад нийт нутгийн  таван хувь нь бэлчээрийн нөөцтэй, таван хувь нь бэлчээр хүрэлцээтэй, 17 хувь нь даац 1-3 дахин хэтэрсэн, 10 хувь нь даац 3-5 дахин хэтэрсэн, 63 хувь нь даац олон дахин хэтэрсэн үзүүлэлттэй байгаа юм.

Өнгөрсөн аравдугаар сарын байдлаар Ховд аймгийн Чандмань сумын 140 орчим өрхийн 130 мянган толгой мал Алтай, Үенч, Булган, Цэцэг, Дуут, Буянт, Зэрэг, Эрдэнэбүрэн, Мөст суманд, 419 өрхийн 356 мянган толгой мал Увс, Говь-Алтай, Баянөлгий, Завхан аймгийн хил залгаа суманд, 19 өрхийн 20,4 мянган толгой мал отроор нүүдэл өвөлжиж байна.

Ховд аймагт зудын эрсдэл өндөр байна. Иймд зудад ихээхэн эрсдэлтэй байгаа газар нутгийг эхний ээлжинд анхаарах, цаашид авах арга хэмжээг оновчтой, шуурхай зохион байгуулах, олон улсын болон хүмүүнлэгийн тусламж, дэмжлэгийг татан оруулах зэрэг арга хэмжээг эртнээс авч хэрэгжүүлэх шаардлагатай байгаа юм.