Жаргалант, 2025 оны тавдугаар сарын 5 /МОНЦАМЭ/. Ховд аймгийн Ус, цаг уур, орчны шинжилгээний төвөөс гаргасан мэдээгээр, тавдугаар сарын 6-14-ний өдрүүдэд цаг агаар тогтворгүй, салхи шуургатай, зарим үед бага зэргийн бороотой байх төлөвтэй байна.

Энэ сарын 6, 7-нд уулархаг нутаг болон их нууруудын хотгор орчмоор, мөн 11-ний өдөр уулархаг нутгаар бага зэргийн хур тунадас орох бөгөөд энэ хугацаанд салхи зарим газраар ширүүсэж, Алтайн салбар уулсаар секундэд 16-18 метр хүрэхийг анхааруулав. Бусад өдөрт салхи дунджаар секундэд 4-9 метр байх төлөвтэй.

Агаарын хэмийн хувьд:

• Уулархаг нутгаар: шөнөдөө -4–+1 хэм, өдөртөө +7–+12 хэм,

• Бусад нутгаар: шөнөдөө +1–+6 хэм, өдөртөө +12–+17 хэм дулаан байна.
  Харин тавдугаар сарын 8-наас нийт нутгаар дулаарч:

• Уулархаг нутгаар: шөнөдөө 0–+5 хэм, өдөртөө +14–+19 хэм,

• Бусад нутгаар: шөнөдөө +6–+11 хэм, өдөртөө +22–+27 хэмийн дулаан болно.

Одоогоор аймгийн нутгаар ургамлын дундаж өндөр 0-6 см байгаа бөгөөд Дуут, Дөргөн, Мөнххайрхан сумын нутгаар бэлчээрийн ургамал цухуйж, хялгана, ерхөг, агь, шарилж, монгол сонгино зэрэг ургамлууд жигд цухуйсан байна.

Мөн сумдад бод мал төллөж эхэлсэн бол зарим газарт ямаа самнах ажил үргэлжилж байна. Малын тарга тэвээрэг сул байгаа нөхцөлд өвс, нэмэлт тэжээлээр хангах, хаваржилтын ажлуудыг шуурхай зохион байгуулах шаардлагатайг мэргэжлийн байгууллагаас зөвлөв.