Сэлэнгэ аймгийн Түшиг суманд гарсан ой хээрийн түймрийн голомт өнөөдрийн байдлаар бүрэн унтраагдаагүй бөгөөд ОБЕГ-ын даргын тушаалаар хойд болон өмнөд бүсийн Онцгой байдлын газрын алба хаагчдыг тусгайлан татан оролцуулж, түймрийн тархалтыг бүх чиглэлд зогсоох ажиллагааг эрчимтэй гүйцэтгэж байна.

Гал түймэртэй тэмцэх газрын ахлах мэргэжилтэн, хошууч Б.Баттүвшин түймрийн нөхцөл байдлын талаар мэдээлэхдээ:

“Түймрийн тархалт зүүн урагш, урагш, баруун урагш, баруун тийш чиглэж байгаа. Цаг агаар хуурайшилттай, салхитай байгаагаас түймрийн тархалт түргэсэх эрсдэл өндөр байна. Үүнтэй уялдуулан бүх чиглэлд унтраах ажиллагааг зохион байгуулж байна” гэв.

Одоогийн байдлаар:

• 324 хүн (ОБГ-ын 250 алба хаагч, 74 орон нутгийн иргэн)

• ОБЕГ, Үндэсний аврах бригад, Нийслэл, Орхон, Дархан-Уул, Өмнөговь, Дундговь, Говьсүмбэр аймгуудын ОБГ

• Ой хөвдөөр бүрхэгдсэн, хүлэр ихтэй, унанги мод, өндөр өвстэй газрын онцлог

гэсэн хүндрэлтэй нөхцөлд ажиллаж байгаа бөгөөд зарим хэсэгт хүрзний ишээр газар шалгаж, гар хүрзээр хөвд ухаж галын голомтыг тогтоон унтрааж байна.

ОБГ-ын ажилтнууд өндөр шатлалын штабын зохион байгуулалтаар, шатахуун, хүнс, багаж хэрэгслийн хангалтыг баруун талаас хоёр чиглэлд хуваан хүргэж байгаа бөгөөд түймрийн голомт руу ойртон ажиллах нөхцөлийг оновчтой бүрдүүлжээ.

Мөн өмнө нь Зүүнбүрэн, Хушаат, Цагааннуур суманд ажиллаж байсан алба хаагчдыг Түшиг сум руу шилжүүлж, хүч нэмэгдүүлэн ажиллуулж байна.

Эх сурвалж: ОБЕГ, Гал түймэртэй тэмцэх газар