Дэлхийн шүрэн хаднууд урьд хожид байгаагүйгээр хурдацтай цайрч, нийт шүрэн хадны 84 хувь ийм үзэгдлийн нөлөөнд өртөөд байгаа талаар судлаачид лхагва гаригт мэдэгджээ. 1998 оноос хойших дөрөв дэх нь болж буй одоогийн үзэгдэл нь 2014-2017 оны үеийнхээс илүү газар авч, дэлхийн шүрэн хадны гуравны хоёрыг хамарсан байна.
Шүрэн дотор амьдарч, тэдгээрийг тэжээдэг өнгөлөг замгууд нь ус бүлээссэний нөлөөгөөр хорт бодисуудыг ялгаруулж, улмаар тэдгээрийг гадагшлуулахад хүргэх үед шүрэн хад цайрдаг. Энэ нь шүр өвчлөх, өлсгөлөнд нэрвэгдэх эрсдэлийг ихээхэн нэмэгдүүлдэг байна. 2023 оноос хойш дэлхийн шүрэн хаднууд хурдацтай цайрах болсныг олборлодог түлш шатаах болон хүний буруутай үйл ажиллагаанаас үүдэлтэй дэлхийн дулаарлын улмаас далай тэнгисийн усны температур нэмэгдсэнтэй холбон тайлбарлаж байна.
Олон улсын шүрэн хадны нийгэмлэгийн гүйцэтгэх нарийн бичгийн дарга, АНУ-ын Далай тэнгис, агаар мандлыг судлах үндэсний газрын /NOAA/ тэтгэвэрт гарсан шүрэн хад судлаач Марк Икин хэлэхдээ, манай гаргийн нүүр царай, амьдрал, амьжиргааг тэтгэх далай тэнгисийн чадвар өөрчлөгдөж буй үйл явцыг бид харж байна гэлээ. “Шүрэн хадыг хамгаалах хамгийн сайн арга бол уур амьсгалын өөрчлөлтийн үндсэн шалтгааныг арилгах явдал юм. Энэ бол ихэвчлэн олборлодог түлш шатааснаас ялгардаг хорт хийн хэмжээг бууруулах ёстой гэсэн үг. Бусад аргын хувьд шийдэл болохоосоо илүүтэй шархны лент шиг нөлөө үзүүлэхээр харагдаж байна” гэж М.Икин нэмж хэлсэн байна.
Өнгөрсөн онд дэлхийн түүхэн дэх хамгийн халуун жил тохиож, далайн гадаргуугийн жилийн дундаж температур 20.87 хэм болж түүхэн дээд үзүүлэлтэд хүрчээ. Манай гараг дэлхий аж үйлдвэржилтийн өмнөх үеийнхээс 1.5 хэмээр дулаарвал дэлхийн шүрэн хадны 70-90 хувь нь устаж үгүй болно гэж эрдэмтэд тооцоолж байна. Энэ нь хүмүүсийн амьжиргаа болоод биологийн төрөл зүйлд асар их сөрөг нөлөө үзүүлэх юм. Улмаар 2 хэмээс хэтэрвэл ерөнхийдөө бүх шүрэн хад устаж үгүй болно гэдгийг судлаачид хэлж байна. Хэрэв цаг уурын талаар баримталж буй өнөөгийн бодлого үргэлжлэн хэрэгжвэл 2100 он гэхэд дэлхий 3.1 хэмээр дулаарна.
