Экологийн цагдаагийн алба байгаль хамгаалах чиглэлээр хийж буй хяналт шалгалтын хүрээнд ховор, нэн ховор амьтдыг хууль бусаар агнасан ноцтой зөрчлүүдийг илрүүлжээ.

2025 оны хоёрдугаар сард Хөвсгөл аймгийн Эрдэнэбулган сумын нутагт хоёр иргэн бүлэглэн Засгийн газрын 2012 оны 07 дугаар тогтоолоор ховор амьтдын жагсаалтад багтсан хүрэн баавгайг хууль бусаар агнасан байна. Түүнчлэн Сэлэнгэ аймгийн Ерөө сумын Улсын тусгай хамгаалалттай газарт зургаан этгээд нэн ховор амьтанд тооцогддог шивэр хандгайг зохион байгуулалттайгаар агнаж, улмаар бусдад худалдах гэж байсныг цагдаагийн байгууллагаас таслан зогсоожээ.

Эдгээр хэргийн хүрээнд гэмт хэрэг үйлдэхдээ ашигласан галт зэвсэг, сум, тээврийн хэрэгсэл болон амьтдын түүхий эд, эрхтэн зэргийг хураан авч, битүүмжлэн мөрдөн шалгах ажиллагаа үргэлжилж байна.

Экологийн цагдаагийн албанаас иргэдийг байгаль хамгаалах хууль, журмыг чанд мөрдөж, ховор амьтдыг хамгаалах, гэмт хэрэг, зөрчлөөс урьдчилан сэргийлэхийг уриалж байна. Мөн ижил төрлийн мэдээлэл, зөрчил байвал холбогдох байгууллагад нэн даруй мэдэгдэхийг сануулжээ.

Эх сурвалж: Экологийн цагдаагийн алба