Австрали, Монголын хамтын ажиллагааг өргөжүүлэн сурталчлах зорилготой Австралийн долоо хоног энэ жил “Тогтвортой байдал, ногоон хөгжил” сэдвийн хүрээнд зохион байгуулагдаж байна. Үйл ажиллагааны хүрээнд олон салбар чиглэлийн арга хэмжээнүүд болохоос гадна соёл урлагийн тоглолт, бизнес, худалдааны арга хэмжээнүүд төлөвлөгджээ. Мөн боловсролын салбарт Австрали Улсын оруулсан хөрөнгө оруулалтыг танилцуулж, хамтын ажиллагааг өргөжүүлэх зорилгоор боловсролын чиглэлээр олон ажлууд хийхээр төлөвлөсөн байна.

Долоо хоногийн эхний арга хэмжээ болох “Эмэгтэйчүүдийн манлайллын хөтөлбөр” хэлэлцүүлэгт Байгаль орчин, уур амьсгалын өөрчлөлтийн сайд С.Одонтуяа оролцож, Австрали Улсын Засгийн газрын санхүүжилттэй төслийн талаар онцоллоо. Тэрбээр 2024 онд Австрали Улсын Засгийн газар Монголын эмэгтэйчүүдийн уур амьсгалын өөрчлөлтийг даван туулах чадавхыг бэхжүүлэх зорилгоор 2.5 сая австрали долларын санхүүжилт бүхий төсөл хэрэгжүүлсэн талаар дурдлаа.

Мөн тэрээр жендэрийн тэгш байдлыг хангах чиглэлд Монгол Улсын Засгийн газар онцгой анхаарч байгааг онцлон:

• Байгаль орчны эмэгтэй манлайлагчдын бүлгийг байгуулах санаачилга гаргасан,
• Цөлжилттэй тэмцэх тухай НҮБ-ын талуудын 17 дугаар хурлыг ирэх жил Монгол Улсад зохион байгуулах,
• “Жендэрийн эрх тэгш байдал ба уур амьсгалын өөрчлөлт” олон улсын хурлыг 2025 оны тавдугаар сарын 22-23-нд зохион байгуулахаар төлөвлөсөн тухай мэдээлэв.

Австралийн тэтгэлэгт хөтөлбөрийн захирал Л.Энхтүвшин хэлэлцүүлгийн үеэр эмэгтэйчүүдийн үүрэг оролцоог нэмэгдүүлэх, шийдвэр гаргах түвшинд дуу хоолойг нь хүргэх зорилготойг онцолж, Австралийн Засгийн газрын тэтгэлэгт хөтөлбөрийн хүрээнд магистрын болон богино хугацааны сургалт, эмэгтэйчүүдийн манлайлал, төгсөгчдөд чиглэсэн олон ажлууд хэрэгжиж байгааг дурдав.