Хөвсгөл аймгийн Цагаан-Үүр суманд нүүрсийг орлох хатсан модны нөөц 40 орчим жил хүрэлцэх боломжтой гэж эрдэмтэд тогтоожээ. Үүнээс гадна Төв аймгийн Мөнгөнморьт, Хэнтий аймгийн Батширээт сумдад ч олон жилийн турш ашиглах боломжтой ихээхэн хэмжээний нөөц бий.

ШУТИС-ийн харьяа “Ойн модны сургалт, судалгааны хүрээлэн”-гийн эрдэм шинжилгээний ажилтан, доктор Н.Билигтийн хэлж буйгаар, ойн нөөцийг зөвхөн хамгаалахаас илүүтэйгээр зохистой ашиглах нь эдийн засгийн хувьд үр ашигтайгаас гадна уур амьсгалын өөрчлөлтийг даван туулахад эерэг нөлөө үзүүлэх аж.

Судалгаагаар тухайн бүс нутагт байгаа модны 30-40 орчим хувь нь унанги болон босоо хатсан мод байдгийг тогтоосон бөгөөд эдгээрийг ашиглах боломжийг тооцоолжээ. Цагаан-Үүр сумын хувьд энэ төрлийн модны нөөц нь 43 жил тасралтгүй хангах боломжтой бол Төв аймгийн Мөнгөнморьт сумд хамгийн их буюу 50 гаруй жилийн нөөцтэй байна.

Судлаачдын үзэж буйгаар, ийм төрлийн модыг зөвхөн түлш болгон ашиглах бус, бусад улс орнуудын жишгээр дулааны болон эрчим хүчний цахилгаан станцуудад ашиглах боломжтой. Мөн их хэмжээтэй унанги модыг цэвэрлэхгүй орхисноор ойд гал түймэр дэгдэх эрсдэлийг нэмэгдүүлж, зэрлэг амьтдын идээшилтэд саад болох, хортон шавж олшрох зэрэг сөрөг үр дагавар үүсдэгийг анхааруулж байна.

Энэ талаар дэлгэрэнгүй мэдээллийг “Ойг хамгаалах хөрөнгө оруулалт, шинэ ирээдүй” сэдэвт 8-11 нэвтрүүлгээс ирэх Даваа гарагт хүлээн авч сонсох боломжтой.

Эх сурвалж: ШУТИС-ийн "Ойн модны сургалт, судалгааны хүрээлэн"