Монгол орны хэмжээнд сүүлийн таван жилд нийт 621 орчим ой, хээрийн түймэр бүртгэгдсэн бөгөөд өнгөрсөн онд 21 аймгийн 55 суманд 137 удаагийн түймэр гарсан талаар албаныхан мэдээлэв.

Онцгой байдлын ерөнхий газрын мэдээлснээр хуурайшилт ихтэй дөрөв болон аравдугаар саруудад ой, хээрийн түймрийн дуудлага хамгийн их ирдэг бол 5-7 дугаар сарын хооронд 12-15 удаагийн түймрийн тохиолдол бүртгэгддэг байна.

ОБЕГ-ын Гал түймэртэй тэмцэх газрын дарга, хурандаа Ц.Нямбаяр хэлэхдээ, “Сүүлийн дөрвөн жилд гарсан 480 удаагийн ой, хээрийн түймрийн тэн хагас нь Сүхбаатар, Хэнтий, Дорнод аймагт бүртгэгдсэн. Цаг уур, орчны шинжилгээний газраас гаргасан урьдчилсан мэдээгээр цаг агаарын огцом дулаарал, хүйтрэл ажиглагдаж, ихэнх нутгаар дунджаас дулаан, хур тунадас багатай байх төлөв гарсан. Үүнээс шалтгаалан хуурайшилт, салхи шуурга ихтэй байх магадлал өндөр байна” гэв.

Энэ хаврын улиралд ой, хээрийн түймрээс урьдчилан сэргийлэх зорилгоор төв, орон нутгийн онцгой комиссын дарга, онцгой байдлын удирдлагуудад анхааруулга, зөвлөмж хүргүүлж, сэрэмжлүүлж байгааг онцолжээ.

Эх сурвалж: Онцгой байдлын ерөнхий газар