Цасан болон шороон шуурганы улмаас зарим аймаг, сумдад нөхцөл байдал хүндэрчээ. Арваннэгдүгээр сарын 25-нд Говь-Алтай аймгийн Бугат суманд салхи 40-42 м/с хүрч, шороон шуурга шуурсны улмаас 102 өрхийн гэр нурж, 15 байшингийн дээвэр хууларч, цахилгааны шон унаж цахилгаан халаалт бүрэн тасарсан байна.
Аймгийн Засаг даргын захирамж гарсны дагуу сумдын удирдлагууд малчид ард иргэдтэй шуурхай холбоо тогтоосноор хүний амь эрсдэх, малчид малтайгаа уруудаж төөрсөн тохиолдол гараагүй аж. Одоогоор хохирлыг барагдуулахаар холбогдох албан байгууллагууд газар дээр нь ажиллаж байгаа юм байна. Үүсээд буй нөхцөл байдалтай холбогдуулан Онцгой байдлын ерөнхий газрын мэргэжилтэн хошууч Ч.Туяатай холбогдлоо.
Тэрбээр “Хүчтэй цасан шуурганы улмаас энэ сарын 25-нд Баян-Өлгий, Говь-Алтай, Увс, Ховд дөрвөн аймгийн 52 суманд цахилгаан тасарсан. Нийт 216 гэр, аж ахуйн нэгж, байгууллагын 27 барилгын дээвэр нурсан. Одоогоор орон гэргүй болсон айл өрхүүдийг гэртэй болгохоор ажиллаж үнэлгээний судалгааг хийж байна. Зарим айл өрхийн гэр бага зэрэг эвдэрсэн тохиолдол бий. Мөн есөн иргэн шуурганд төөрсөн байсныг эсэн мэнд олж, 1600 бог малыг илрүүлж эздэд нь хүлээлгэн өгсөн. Мөн Увс аймагт хоёр тээврийн хэрэгсэл цасанд суусан байсныг гаргасан. Аймгууд хохирлыг барагдуулахаар ажиллаж байгаа тул үнэлгээ нь гараагүй байна” гэлээ.
