Байгаль орчин, уур амьсгалын өөрчлөлтийн яамны Байгалийн нөөцийн бодлогын хэрэгжилтийн газар, Тусгай хамгаалалттай газар нутгийн бодлогын хэрэгжилтийн газар хамтран Тусгай хамгаалалттай газруудын Хамгаалалтын захиргаадын удирдлагууд болон аймгуудын Байгаль орчны газрын дарга нарын оролцоотой цахим хурал зохион байгууллаа.
Хурлаар саарал чонын тоо толгой ихэссэнтэй холбогдуулан мал сүргийг хамгаалах, тоо толгойг зохицуулах асуудлаар Амьтны тухай, Байгалийн нөөц ашигласны төлбөрийн тухай хууль болон бусад хууль тогтоомжийн хүрээнд чиглэл өгч ажиллахыг үүрэг болгожээ.
2019-2024 оны хооронд аймгуудад нийт 1056 саарал чоныг ахуйн зориулалтаар агнах зөвшөөрөл олгосон боловч одоогоор 153 чоныг агнаад байна.
Мөн Байгалийн нөөц ашигласны төлбөрийн тухай хуулийн 22.1.3 заалтыг хэрэгжүүлж, мал сүргийг хамгаалах, тодорхой нутаг дэвсгэрт тоо толгойг сийрэгжүүлэх зорилгоор чоно агнах үйл ажиллагаанд төлбөрөөс чөлөөлөх зохицуулалтыг дагаж мөрдөх чиглэл өгчээ.
