Завхан аймгийн Хомын тал нь арал мэт өвөрмөц тогтоцтой учир амьтдын аюулгүй таатай амьдрах орчин болдог. Зарим амьтны хувьд хоргодож үлдэх сүүлчийн тархац нутаг ч байж болох юм гэж "Хомын талын тахь" ТББ-аас онцлов.

Учир нь Хомын талд нутагладаг тахь, бөхөн зэргээс гадна сэлгэн нутагшуулсан цагаан зээрийн тоо толгой өсөж 8000 гаруйд хүрчээ. Цагаан зээр нь Завхан аймгийн Дөрвөлжин сумын нутаг, Хомын талд л бий.

Цагаан зээрийг сэлгэн нутагшуулснаас хойш зээрийн тоо толгой тогтворжоод зогсохгүй Хангайн нурууны баруун хэсгээр ч нүүдэллэх болсон байна.

Хомын тал нь монгол орны баруун хэсэгт, Их нууруудын хотгорт орших бөгөөд Их Монгол элсний баруун хойд үзүүр болон Хар нуур, Багануур, Дөргөн нуур, Завхан гол, Тээл гол зэрэг ус намгархаг газруудтай, говь хээрийн бүсийн нутаг юм.

Баруун, хойд болон зүүн талаараа хоорондоо холбоо бүхий усан сүлжээгээр, өмнөд талаараа их элсэн манхнуудаар хашигдсан 2900 хавтгай дөрвөлжин км талбай бүхий "байгалийн арал" юм.  

Хомын талд 46 зүйлийн хөхтөн амьтан бүртгэгдсэнээс 7 нь бүс нутгийн болон олон улсын улаан дансанд бүртгэгджээ. Үүнд, тахь, янгир, хар сүүлт зээр, бөхөн, цагаан зээр, зэгсний зэрлэг гахай зэрэг амьтад байна. Цоохор ирвэс гүйдлээр тохиолддог гэв.

Сонирхуулахад Завхан аймаг 2023 оны амьтдын тооллогоор аргаль 447, янгир 1367, халиун буга 3717, бор гөрөөс 2714, цагаан зээр 8000, зэрлэг гахай 30, саарал чоно 541, шар үнэг 500, хярс 700, халздай дорго 300, мануул мий 100, тарвага 7906, боролзон туулай 8500, чандага 4200, өмхий хүрэн 1200-г тоолсон байна.  

Завхан аймгийн Дөрвөлжин сумын нутаг, Хомын талд тахь буюу Пержевальскийн адууг сэргээн нутагшуулснаас гадна цагаан зээрийг мөн сэлгэн нутагшуулсан юм.

1988-1990 онд Биологийн хүрээлэн, Анчдын нийгэмлэг хамтран дорнодоос цагаан зээрийн 600 гаруй янзагыг

Хомын тал руу тээвэрлэн нутагшуулжээ.

Цагаан зээрийн туурай жижиг, шилбэ нарийн бөгөөд гэрийн хонь, ямаа шиг хөлөө газраар үргэлжлүүлэн чирэлгүй дээр өргөж явдаг. Тийм учраас ургамлын ишийг хугалж унаган бэлчээрийг талхилдаггүй онцлогтой амьтан юм.