Бага тойрог орчмын ургаа модыг тайрсан асуудал гарч, иргэдийн бухимдлыг төрүүлсэн. 

Тэгвэл ургаа модыг яагаад тайрсан талаар албаныхан тайлбарлав.

"Улаанбаатар Дулааны Сүлжээ" ТӨХК-ийн Үйлдвэр хөгжлийн хэлтсийн дарга Б.Эрдэнэбаяр "Дэлхийн банкны санхүүжилтээр Бага тойрог орчмын дулааны шугамыг шинэчлэх ажлыг хийхээр төлөвлөсөн. Энэ орчмын дулааны шугамыг 1997 онд суваггүй угсарсан, насжилт нь дууссан. Уг шугамыг солих ажлын хүрээнд өнгөрсөн амралтын өдрүүдэд мод, бутыг зөөж шилжүүлэх ажил хийгдсэн. Бага тойрог орчмын халуун усыг өнөөдөр хаагаад наймдугаар сарын 1-н хүртэл шугам солих ажил хийгдэнэ. Нэлээн хүндрэлтэй байршилд хийгдэх дулааны шугамын шинэчлэлийн ажил юм" гэлээ .

Үргэлжлүүлэн УБЗАА-ны Хотын ногоон байгууламж, цэцэрлэгжүүлэлтийн хэлтсийн дарга С.Эрдэнэсайхан "4а,б магистраль буюу Цаг уур, орчны шинжилгээний газраас МУБИС хүртэлх дулааны шугамыг сольж байгаа юм. Энэ ажилд Цаг уур, орчны шинжилгээний газраас Хүнсний нэгдүгээр дэлгүүр хүртэлх ногоон байгууламж хамгийн их өртөж байна. 6,000 гаруй мод, бут сөөг дээрх талбайд байдаг. 

Эхний ээлжид өнгөрсөн долоо хоногт Бага тойрог орчмоос 287 мод, бут шилжүүлсэн. Эдгээр мод бутыг их ургамлын мод үржүүлгийн газартаа шилжүүлсэн. Дулааны шугамын засвар дуусахаар буцааж суулгана. УБЗАА нь их ургамлын мод үржүүлгийн 32 га талбайтай.

Бага тойрогт дулааны шугамын засвар хийгдэж буй трасст том 18 улиас мод тайрагдсан. Шилжүүлэн суулгах бололцоогүй долоон улиасыг тайраад үлдээсэн. Насжилт гүйцсэн учраас улиасны үндэс нь байшингийнхаа доор 4 метр орчим урт болчихсон. Эдгээр улиас мод нь 60-70 жил болчихсон. 50 жил болсон улиасыг насжилт гүйцсэн гэж үздэг. Тайраад үлдээсэн долоон улиасны талбай дээр 5 метр өндөртэй нарс мод тарихаар төлөвлөсөн" гэв.