Энэ удаа Европын холбооны гишүүн орнуудаас Монгол Улсыг хавсран Бээжин, Сөүл зэрэг хотод суугаа Элчин сайд нар Монголыг зорин ирж оролцож байгаагаараа "Европын өдөрлөг-2023" өргөн болж буйг Европын холбооноос Монгол Улсад суугаа Элчин сайд Аксель Никэйз онцолж байлаа.

-Европын холбоо, түүний гишүүн орнуудаас Монгол Улсад хэчнээн хэмжээний зээл тусламж үзүүлж, хэдий хэмжээний хөрөнгө оруулаад байна вэ?

-Европын холбооны санхүүжилтээр хэрэгжүүлж буй төслүүдийг нийтэд авч үзэхэд 150 сая орчим еврогийн дүнд хүрч байгаа. Эдийн засгийг солонгоруулж төрөлжүүлэх, засаглалыг сайжруулах, шүүх засаглалыг дэмжиж, ардчиллыг бэхжүүлэх, цаашлаад эрчим хүчний хангамж, аюулгүй байдал, тогтвортой ХАА-г хөгжүүлэх, ойн чиглэлээр гээд их олон салбарт төсөл хэрэгжиж байна. Үүнээс голлохыг дурдвал төсвийн дэмжлэг үзүүлэх 50 сая еврогийн төслийг Сангийн яамтай шууд хамтран хэрэгжүүлж байгаа.

-Орон нутаг руу чиглэсэн ямар үйл ажиллагаа, төслүүд байгаа вэ?

-Хөдөө, орон нутагт түрүүн хэлснээр тогтвортой ХАА-г хөгжүүлэх, ногоон эдийн засаг руу шилжих гэсэн хоёр гол чиглэлээрх төслүүдийг бид 2021-2027 оны хооронд хэрэгжүүлэхээр ажиллаж байна. Эдгээр нь хүнсний аюулгүй байдлыг хангах, уур амьсгалын өөрчлөлттэй дасан зохицох үүднээс ойжуулалтыг нэмэгдүүлэхэд чиглэж байгаа.

Түүнчлэн Монгол Улсын Ерөнхийлөгч У.Хүрэлсүхийн санаачлан Монгол орон даяар хэрэгжүүлж буй “Тэрбум мод” болон “Хүнсний аюулгүй байдал-хүнсний хувьсгал” гэсэн үндэсний хөдөлгөөн, хоёр гол том хөтөлбөртэй шууд нийцэн хэрэгжээд явж байна. 

Мөн бид ЖДҮ эрхлэгчдийг болон бичил бизнесийг дэмжих, мэргэжлийн сургалт үйлдвэрлэлийн үйл ажиллагаа, суралцагсдын ур чадварыг нэмэгдүүлж, хөдөлмөр эрхлэлтийг дэмжих чиглэлээр ажиллаж байна.

Монгол Улс, Европын холбооны хоорондох худалдааны эргэлт 30 хувиар нэмэгдээд буйг Гадаад харилцааны дэд сайд Г.Амартүвшин “Европын өдөрлөг-2023”-ийн нээлт дээр онцлон дурдлаа.

Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч З.Төмөртөмөө “Европын өдөрлөг” нь бусад орны өдөрлөгөөс онцлогтой байдаг. Учир нь Европын холбооны 27 гишүүн орны соёл уламжлалыг танилцуулан, урлагийн тоглолт толилуулж, Европын холбооны санхүүжилтээр Монгол Улсад хэрэгжүүлж буй төсөл хөтөлбөрүүд, аж ахуйн нэгжүүдийн үйл ажиллагааг олонд таниулах боломжтой юм. Тус өдөрлөгийг нэг өдөр зохион байгуулаад дуусдаг нь чамлалттай. Учир нь Нийслэл Улаанбаатар хот Европын холбооны 40 гаруй хоттой найрамдалт, хамтын ажиллагаатай бөгөөд тэдгээр улсын соёл уламжлал, бизнесийн боломжуудыг таниулахад олон өдөр шаардлагатай гэж харж байна. Иймд ирэх жилээс энэхүү арга хэмжээг илүү өргөжүүлэх тал дээр анхаарна” гэлээ.

"Европын өдөрлөг"-т оролцогчдын нэг “Голден Гоби” компанийн санхүү хариуцсан захирал Б.Уянга, манай үйлдвэр Европын холбооны гишүүн Бельги улсын 50 хувийн хөрөнгө оруулалттай, дотоодоосоо мөн 50 хувийн санхүүжилттэй үйл ажиллагаагаа явуулж байна. Өдөрлөгт бид шинэ бүтээгдэхүүнээ дэлгэсэн. Их олон хүн ирж оролцож буйд таатай байна. Өнөөдрийн өдөрлөг бидэнд шинэ бүтээгдэхүүнээ танилцуулах боломжийг олголоо. Улс орон бүр танин мэдэхүйн чиглэлээр үйл ажиллагаагаа танилцуулж байгаа нь сонирхолтой байна. Манайх “Европын өдөрлөг”-т анх удаа оролцож байна гэв.

Европын холбооноос Монгол Улсад суугаа Төлөөлөгчийн газраас зохион байгуулж буй “Европын өдөрлөг”-өөр Д.Сүхбаатарын талбайд тус холбооны гишүүн орнууд болон Европын холбооноос манай улсад хэрэгжүүлж буй төсөл, хөтөлбөрийн газрууд тус тусын асар барьж, өөрсдийн үйл ажиллагаагаа танилцуулан сурталчилж байна.

Тодруулбал, Европын онцлогийг харуулсан өвөрмөц уламжлал, соёл, аялал жуулчлалын үйлчилгээ, бүтээгдэхүүнийг танилцуулж, боловсрол эзэмших боломжууд болон Европын холбооны гишүүн улсууд руу аялах, шенгений визийн талаар дэлгэрэнгүй зөвлөгөө, мэдээлэл хүргэж байна. Энэ удаагийн өдөрлөгт Швед, Румын улсаас уран бүтээлчид Монголыг зорин ирж концертоо тоглож байна.