Өнгөрсөн дөрөвдүгээр сарын 27-ны өдөр Нийслэлийн шүүхийн шийдвэр биелүүлэх газрын үүдэнд #NoWar хөдөлгөөний зохицуулагч Э.Одбаярыг заналхийлсэн хэрэг гарч, цахим хуудаст бичлэг цацагдсан билээ.
Тус заналхийлсэн этгээд нь Реппер Д.Мөнх-Оргил гэх нэгэн байсан ба Э.Одбаярын биед халдаж, танхайрах үедээ "Би чамайг байнга дагах болно" хэмээн сүрдүүлж байв.
Тухайн өдөр цагдаагийн байгууллагаас "танхайрсан гэх этгээдийг саатуулаагүй, шалгаж байгаа. Мэдүүлэг авч, мөрдөн шалгалтыг үргэлжлүүлнэ" гэж байв.
Тэгвэл бусдын биед халдаж, танхайрсан Д.Мөнх-Оргилд хамаарах зөрчлийн хэргийг шалгах ажиллагаа дуусч, 100 мянган төгрөгөөр торгох шийтгэл ноогдуулсан байна.
Дабль стандартыг эсэргүүцэгч залуус 2021 оноос үзэл бодлоо илэрхийлж, тайван замаар жагсаал цуглаан хийж байв. Гэсэн ч өнгөрсөн онд тус хөдөлгөөнийхөнд Д.Монголхүүг 461 дүгээр хорих ангиас оргуулсан, гар утсаар бичлэг хийж болохгүй гэх шаардлагыг эсэргүүцсэн зэрэг үндэслэлтэй хэрэгт холбогдуулж шалгаж эхэлсэн байдаг. Улмаар дабль стандарт, дайны эсрэг үзэл бодлоо илэрхийлсэн залууст 2022 оны арваннэгдүгээр сард тус бүр 1-1,2 жил цахим гавтай зорчих эрх хязгаарлах ял оноосон. Мөн энэ оны нэгдүгээр сарын 31-нд Нийслэлийн давж заалдах шатны шүүх гомдлыг хэлэлцэж, өмнө нь оноосон ялыг хэвээр үлдээсэн байдаг. Э.Одбаяр, Б.Билгүүн, Ц.Чинбат нарын таван хүн Үндсэн хуулиар хамгаалагдсан шүүхээр гэм буруугүй гэдгээ тогтоолгох гомдол гаргасан ч Улсын дээд шүүх гомдлыг хэлэлцэхээс татгалзсан юм.
Тодруулбал, Улсын дээд шүүхийн Эрүүгийн хэргийн танхимын нийт шүүгчийн хуралдаанаар Э.Одбаяр, Ц.Чинбат, Б.Билгүүн, Л.Ганхөлөг, Б.Бямбагэрэл нарт холбогдох хэргийг шүүгдэгч нарын өмгөөлөгчдийн гаргасан гомдлыг үндэслэн хяналтын шатны шүүх хуралдаанаар хэлэлцүүлэх эсэхийг энэ сарын 5-ны өдөр хэлэлцсэн. Шүүгдэгч нарын өмгөөлөгчдийн гаргасан гомдол Эрүүгийн хэрэг хянан шийдвэрлэх тухай хуулийн 40.1 дүгээр зүйлийн 1 дэх заалтад заасан хяналтын журмаар гомдол, эсэргүүцэл гаргах үндэслэлд хамаарахгүй тул уг хэргийг хяналтын шатны шүүх хуралдаанаар хэлэлцүүлэхээс татгалзаж шийдвэрлэсэн. Ингэснээр давж заалдах шатны шүүхийн магадлал хэвээр үлдсэн.
Ийнхүү Э.Одбаяр нарын таван хүн нэг жилийн хугацаанд зорчих эрхээ хязгааруулсан бөгөөд дөрөвдүгээр сарын 27-ны өдөр Нийслэлийн шүүхийн шийдвэр биелүүлэх газарт цахим гав зүүх үеэр халдлагад өртсөн юм.
