"Мед импекс" Интэрнэшнл компани үүсгэн байгуулагдсаны 20 жилийн ойн хүрээнд жимс, хүнсний ногоо зэрэг газар тариалангийн бүтээгдэхүүнд пестицидийн үлдэгдлийг шинжлэх Демо лабораторийг байгууллаа. 

Тус лаборатори нь MNS/ISO/17025 2018 стандартыг хэрэгжүүлэн итгэмжлэлийн гэрчилгээгээ хүлээн авч, үйл ажиллагаагаа эхлүүллээ.

Газар тариалангийн салбарт ургамал хамгааллын бүтээгдэхүүн буюу пестицидийг ургамлын өвчин, хортон шавж, хог ургамалтай тэмцэх, нэгжээс авах, ургацыг нэмэгдүүлэхийн тулд өргөн хүрээнд хэрэглэдэг, зайлшгүй чухал орцуудын нэг болсон. Манай оронд мөн жил ирэх тусам импортоор оруулж ирж буй пестицидийн нэр төрөл болон хэмжээ нэмэгдэж байгаа бөгөөд үүнтэй уялдаад пестицидийн үлдэгдлийг хянах асуудал зайлшгүй гарч ирж байна.

Олон улсын түвшинд хүнсний бүтээгдэхүүнд агуулагдаж байж болзошгүй химийн бодисуудаас үүдэлтэй бохирдлууд, ялангуяа органик бохирдлуудыг улс орнуудыг заавал шалгаж, хянадаг. Мөн энэ чиглэлээр баталж гаргасан стандарт шаардлагуудыг мөрдөж байхыг зөвлөдөг бөгөөд олон улсын хүнсний бүтээгдэхүүний худалдаанд эдгээр стандарт дүрэм журмыг нэвтрүүлж байхыг шаарддаг билээ. 

"Мед импекс" компанийн хувьд аналитик лабораторийн өндөр хүчин чадалтай багажуудыг Монгол улсын зах зээлд ханган нийлүүлж байсан олон жилийн туршлагатай бөгөөд эдгээр багажийн хэрэглээг нутагшуулах, хэрэглэгчдийг чадваржуулах чиглэлээр төрөл бүрийн ажлуудыг санаачлан хэрэгжүүлсээр иржээ. Тэдний хийсэн судалгаагаар Монгол улсын пестицидийн үлдэгдлийг шинжлэх лабораторийн чадамжийг олон улсын түвшинд хүргэх шаардлага, хэрэгцээ байгаа гэж үзсэн байна. Ийм учраас 2020 оны сүүлээс Демо лабораторийг байгуулах төслийг хэрэгжүүлсэн болохыг танилцуулав.

Нээлтийн үйл ажиллагаагаа хийж буй Демо лабораторийн итгэмжлэлийн хүрээг 31 нэр төрлийн пестицидийг жимс, хүнсний ногоо, үр тариа, зөгийн баланд Хроматографийн багажуудаар хийхээр тогтоосон бөгөөд цаашид Монгол улсад импортлохыг зөвшөөрсөн бүх пестицид болон хөрш зэргэлдээ орнуудад өргөн хэрэглэдэг пестицидийн үлдэгдлийн шинжилгээг хийхээр төлөвлөж байгаа аж.

Монгол улсын Ерөнхийлөгчийн санаачлага болон Засгийн газраас хэрэгжүүлж буй “Хүнсний Хувьсгал” хөтөлбөрийн хүрээнд хүнсний үйлдвэрлэлээс гадна, хүнсний бүтээгдхүүний чанар аюулгүй байдлыг сайжруулахад их ач холбогдол өгч буй энэ цаг үед хувийн хэвшлийн санаачлагаар хэрэгжүүлж буй Пестицидийн үлдэгдлийг шинжлэх Демо лабораторийн нээлт цаг үеэ олсон, энэ чиглэлээр үндэсний чадавхийг бэхжүүлэх, улмаар экспорт, импортын бүтээгдхүүнд зайлшгүй хийгдэх ёстой шинжилгээг гүйцэтгэхэд чухал хувь нэмэр оруулна гэж төслийг хэрэгжүүлэгчид үзэж байна.

Монгол улсад пестицидийн үлдэгдлийн шинжилгээг хийх чадамж, эрх зүйн орчныг улам сайжруулснаар бид экспортын бүтээгдэхүүнээ шинжлэх ухааны үндэслэлтэй баталгаажуулах, мөн импортоор оруулж ирж буй хэдэн зуун мянган тонн жимс жимсгэнэ, хүнсний ногоонд ч гэсэн химийн гаралтай бохирдол байгаа эсэхийг хянах боломж бүрдэх юм.

Хувийн хэвшлийнхний энэхүү санал санаачилгыг хүнсний аюулгүй байдлын чиглэлээр ажилладаг төрийн байгууллагууд болон газар тариалангийн бүтээгдэхүүнийг импортлогч, экспортлогч  хувийн хэвшлийнх бүрэн дүүрэн ашиглах том боломж гарч ирж байна.   

Демо лабораторийн үйл ажиллагаатай очиж танилцах сонирхолтой хүмүүс ЭНЭ ЛИНКЭЭР холбогдон,  урьдчилан цаг авч очих боломжтой.