УИХ дахь МАН-ын бүлэг өнөөдөр хуралдаж, хуралдааны шийдвэрийг танилцууллаа.
Энэ үеэр УИХ-ын гишүүн Ж.Бат-Эрдэнэ Төмөр замын тээврийн тухай хуулийн шинэчилсэн найруулгыг УИХ-аар хэлэлцэх гэж байгаатай холбогдуулан мэдээлэл өглөө.
Тэрээр "Уг хуулийн төслийг энэ долоо хоногийн чуулганы нэгдсэн хуралдаанд хэлэлцэнэ. Төмөр замын салбар 1946 онд анхны хэлэлцээрээ хийгээд 1949 онд төмөр замаа барьсан. Энэхүү хууль нь анх 2007 онд батлагдсан бөгөөд зах зээлийн нөлөөллөөр зайлшгүй шинэчлэх шаардлага үүссэн юм.
Шинэчилсэн найруулгын төслөөс онцлох заалтад:
- Төмөр замын тээврийн тухай хуулийг боловсруулахдаа өмнө нь ОХУ-ын хуулийг үндэслэсэн байсан. Энэ удаа үг, үсгийн хувьд шинэчилж, энгийн иргэдэд ойлгомжтой байлгахаар оруулсан.
- Төмөр замын суурь бүтэц эзэмшигч, тээврийн үйл ажиллагаа эрхэлж байгаа компани тусдаа байх зохицуулалт хийсэн.
- Одоогийн байдлаар улсын хэмжээнд 2,800 км орчим төмөр зам бий. Төрийн болон хувийн хэвшлийн төмөр замын хоорондын харьцааг уялдуулахын тулд Төмөр замын агентлаг байгуулна.
- Төмөр замын тээврийн байгууллага өөрсдөө тарифаа гаргаж, үүнийг бодитой эсэхийг төрийн захиргааны байгууллага хянах юм. Орон тооны бус тарифын зөвлөлийг байгуулах зэрэг томоохон шинэчлэлийг тусгасан" гэлээ.
