Олон улсын сувилагчдын өдөр тавдугаар сарын 12-ны өдөр болно. Энэ өдрийг угтсан  “Амлалтаа сонсъё” хэлэлцүүлэг, “Сувилагч ба Эрүүл мэнд” аян, “Сувилахуй ба эрх зүй” сургалт зэрэг нэгдсэн арга хэмжээ улс орон даяар өрнөж байна.

Тухайлбал, энэхүү арга хэмжээ Зүүн бүсийн Дорнод, Сүхбаатар, Хэнтий аймагт болж, өндөрлөлөө.

УИХ-ын гишүүн Ж.Чинбүрэнгийн Ажлын алба, Монголын сувилагчдын нийгэмлэг хамтран зохион байгуулж буй тус арга хэмжээнд сувилагч мэргэжилтнүүд өргөнөөр хамрагдаж байна.  

Зүүн бүсэд болсон арга хэмжээний үеэр Дорнод аймгийн Бүсийн оношилгоо эмчилгээний төвийн Сувилахуй хариуцсан мэргэжилтэн Л.Сугар

“Бид мэргэжилдээ хайртай учир хүн ардынхаа эрүүл мэндийн төлөө гэсэн сэтгэлээр өнөөдрийг хүртэл хүлцэнгүй явж байна. Бид хийх ёстой, хийх ч болно. Хөдөлмөрийн минь үнэлэмжийг нэмэгдүүлээд өгвөл сэтгэл хангалуун цалингаа авна. Хоёр хүүхдээ дагуулаад дуртай зүйлийг нь аваад өгдөг болмоор байна” хэмээн сэтгэгдлээ илэрхийлсэн бол Хэнтий аймгийн Нэгдсэн эмнэлгийн ахлах сувилагч В.Нарантуяа

сувилагч мэргэжлийн үнэлэмжийг яагаад нэмэгдүүлэх ёстой талаар ганцхан жишээ хэлье гээд осол аваар дээр очиж ажилласан Цагдаа, Онцгойгийн ажилтан төрийн тусгай хамгаалалтад ороод 45-тай тэтгэвэрт гарч, тэтгэврээ 80 хувиар тогтоолгодог бол эмч сувилагч юун тусгай хамгаалалт, тэтгэврээ 45 хувиар тогтоолгодог. Эмч сувилагчийг Цагдаа, Онцгойн түвшинд үнэлж өгөхийг хүсье гэв.  

Хэнтий аймгийн Бор-Өндөр сумын эмнэлгийн ахлах сувилагч Н.Боргил

“Сувилагчийн цалин бага, нийгмийн баталгаа сул байдаг нь ажлаа орхиж, харь орныг зориход хүргэж байгаа. Үүнээс болж залуу үе ч энэ мэргэжлийг сонгохгүй болсон. Энэ ужиг шалтгааны үндэс суурь нь төрийн бодлого, баталсан цалингийн сүлжээнд байна. Цалингийн сүлжээг даруйхан өөрчлөх шаардлагатай” гэсэн саналыг хэллээ.   

УИХ-ын гишүүн Ж.Чинбүрэн "Эрүүл мэндийн салбар бусад салбартай харьцуулахад гар дээр очих цалин урамшууллыг нэмж байгаа боловч үндсэн цалин нэмэгдэхгүй байна. Тэтгэвэрт гарахад үндсэн цалингаар тооцдог учир нийгмийн баталгааг бодитойгоор хангаж чадахгүй байгаа юм. Тиймээс үндсэн цалинг нэмэх талаар сувилагчид маань асуудал дэвшүүлж буй…

Сургалт, хэлэлцүүлэгт ирсэн сувилагчдыг хорт хавдрын илрүүлэгт хамруулж байна. Тэд маань загасчны морь усгүй гэдэг шиг 20-30 жил ажиллахдаа хорт хавдрын төрөлжсөн үзлэгт ороогүй гэдгээ нулимс дуслуулан ярилаа" хэмээв.

Манай улсад 13 мянга гаруй сувилагч бий. Бүх сувилагчдыг хамруулж чадахгүй ч тал хувьд нь хүрэх зорилготой нэгдсэн арга хэмжээ бүсчилсэн байдлаар 21 аймаг, 9 дүүрэгт үргэлжилж байна.