Оюутолгой төслийн далд уурхайн бүтээн байгуулалтын гүйцэтгэгч "Уорли инженеринг" ХХК-ийн үйлдвэрчний эвлэлээс үүсээд буй асуудлын талаар мэдээлэл хийлээ. 

Тус компани нь Оюутолгой төслийн далд уурхайн бүтээн байгуулалтын ерөнхий гүйцэтгэгч юм. Компанийн  үйлдвэрчний эвлэлээс "Цалин хөлсийг хуульд заасны дагуу зөв тооцож олгох" шаардлагыг тавьж, 2022 оны арваннэгдүгээр сараас эхэлж компанийн захиргаатай гурван удаа хэлэлцээрт ороод амжилт олоогүй юм байна. Хөдөлмөрийн зууч томилж хоёр талыг оролцуулан хоёр удаа хурал зохион байгуулсан боловч шийдэлд хүрээгүй. 

Тиймээс хөдөлмөрийн тухай хуулийн 25.1.4-т заасны дагуу компанид албан мэдэгдлээ хүргүүлж, гуравдугаар сарын 31-ний өдрөөс энэ асуудал эцэслэх хүртэл хугацаагүй ажил хаялт зарласан. Ажил хаялт дөрөв дэх өдрөө үргэлжилж байгаа бөгөөд компанийн зүгээс албан ёсоор ямар нэгэн хариу өгөөгүй. Харин албан бусаар "Ажил хаялтаа зогсоочих, тэгвэл зөвшилцөлд хүрье" гэсэн аж. Гэвч үйлдвэрчний эвлэлийн зүгээс шаардлагынхаа хариуг албан ёсоор авах хүсэлтэй. 

Хоёр талын санал зөрөлдсөн гол асуудал нь Монгол Улсад огт мөрдөгддөггүй 2,080 цаг буюу сардаа 173 цаг ажиллаж, гэрээнд заасан цалингаа авахаар болсон явдал аж.  Хөдөлмөрийн шинэ хуулиар 14/14 болсонтой холбогдуулан сардаа 112-136 цаг ажиллах ёстой. Гэтэл 173 цаг гэх хэзээ ч хүрэхгүй цагийг тавьчихаад байна. Жилдээ 1,576 буюу сардаа 131.3 цаг ажиллах боломжтой. Үүнийг фонт цаг болгож цалин хөлсийг маань олгооч гэх асуудлаар маргаан эхэлсэн. 

Хэлэлцээрийн явцад компанийн зүгээс илүү цагийг олгохгүй үндсэн цалинг нэмье гэсэн. Үндсэн цалингийн нэмэгдэл нь илүү цагийг маань нөхөж хүрэхээргүй байдлаар санал болгосон. Тиймээс 290 гаруй хүн ажил хаялт зарлаад, албан ёсны хариуг хүлээж байна гэв.