Мөрдөн шалгах ажиллагаанаас гадаад улс руу оргон зайлсан, интерполоор эрэн сурвалжилж, гадаад улсаас буцаан авчрах хүмүүсийн нэрсийг Хууль зүй, дотоод хэргийн сайд Х.Нямбаатар өнөөдөр зарлалаа. 

Тэрээр "Ерөнхий сайдын өгсөн албан даалгаврын дагуу мөрдөн шалгах ажиллагаанаас оргон зайлсан хүмүүсийг гадаад улсаас авчирч, мөрдөн шалгах ажиллагааг хэвийн, тасралтгүй үргэлжлүүлэх чиглэлийг өгсөн. Энэ дагуу АТГ, ерөнхий прокурорын газар, тагнуул, цагдаагийн байгууллагад албан бичиг хүргүүлсэн. Албан бичгийн хариуд мөрдөн шалгах ажиллагаанаас оргон зайлсан 90 хүн байна.

Үүнээс авлига, албан тушаалын хэрэгт шалгагдаж байхдаа оргон зайлсан 7 хүн байна. Өнөөдөр хоёр хүн нэмэгдэх байх. Иргэн Т.Бадамжунай, Н.Удаанжаргал нар яллагдагчаар татахаас өмнө гадагшаа гарч явсан, оргон зайлсан гэж хэлэх боломжгүй байна.

АТГ-ын удирдлагуудтай өчигдөр уулзаж ярилцсан. Энэ хоёр хүнийг яллагдагчаар татах саналаа нийслэлийн прокурорт хүргүүлж байгаа. Яллагдагчаар татах тогтоолыг баталсан тохиолдолд интерполоор эрэн сурвалжилна гэдгээ хэлсэн. Нийт 92 хүнийг эрэн сурвалжилж, гадаад улсаас авчрахаар болж байна.

УПЕГ-т эдгээр хүмүүст авсан таслан сэргийлэх арга хэмжээ хэрэгжихгүй байгаа талаар албан бичиг хүргүүлсэн. Өөрөөр хэлбэл, Улсын бүртгэлийн газарт бүртгэлтэй байгаа эдгээр хүний гадаад паспортын хөдөлгөөнд хязгаарлалт тогтоох бичгийг хүргүүлж байгаа. Мөрдөгчийн санал ирвэл эдгээр иргэний гадаад паспортын хугацааг түдгэлзүүлнэ.

Ерөнхий сайд асан Ч.Сайханбилэгийн хувьд 2019 оны арванхоёрдугаар сарын 26-нд Буянт-Ухаа боомтоор Монголоос гарсан. Тэрээр АНУ-д амьдарч байгаа бөгөөд байршил, хот нь тодорхой байна. "Тавантолгой төмөр зам" компанийн Гүйцэтгэх захирал асан Н.Удаанжаргалын хувьд өнгөрсөн намар Солонгос чиглэлд явсан. ХХААХҮ-ийн сайд асан Т.Бадамжунай гэдэг хүний хувьд 2018 онд Замын-Үүд боомтоор хилээр гарсан байна. 

Хаана байгаа нь тодорхойгүй хүмүүс бий. Сандагдоржийн Төмөрбат, Пандийгийн Болортуяа нар нь хаана байгаа нь мэдэгдэхгүй байгаа.

Харин Төмөрсүхийн Отгонбаатар БНСУ-д, Батсуурийн Мөнхзул Францад, Туяагийн Даниел БНХАУ-д амьдарч байгаа гэх мэт мэдээлэл байна. 

Дипломат харилцааны шугамаар гадаадын улс орны хууль сахиулах байгууллагатай хамтран ажиллаж байж эдгээр хүнийг эргүүлэн авчрах ажиллагааг зохион байгуулна. Битүүний урд өдөр Эрүүгийн Цагдаагийн Албаны холбогдох албан тушаалтнууд Европын холбоонд хандаж, хэд хэдэн хүнээс гэрчийн мэдүүлэг авах ажлыг хийсэн. Б.Хурц гэдэг хүн Европын холбооноос хүнийг хүчээр авч гарч, Монголд авчирсантай холбоотойгоор хоригдож байсан. Манай улсад дипломат харилцааны асуудал үүссэн юм. Тиймээс гадаад улсад мөрдөн шалгах ажиллагаа явуулахад зөвхөн Элчин сайдын яамны байранд тухайн хүмүүсээс тодруулга авч, яллагдагчаар татагдсан тогтоолыг танилцуулах хүрээнд л ажиллагаа явуулна. Түүнээс биш бид өөрсдөө дайчлан баривчлах ажиллагаа зохион байгуулахгүй. 

Эрх зүйн талаар харилцан туслалцах гэрээтэй улс орнуудад хууль сахиулагчдаар нь дамжуулж эдгээр ажлыг хийх боломжтой. Тодорхой ажлын төлөвлөгөө гарч байгаа. 

Шувуу ажиллагааны хүрээнд гадаад харилцааны ажлыг эрчимтэй явуулна. Интерполын шугамаар манай улсад хүмүүсийг хүлээлгэж өгөөд л байгаа. Яг одоо бол ирээгүй байгаа хүмүүсийн асуудлыг ярьж байна" гэлээ.