Өнөөдөр өглөө 09.00 цагт Улаанбаатар чуулгын байранд эхэлсэн Хөгжлийн банкны хэргийн шүүх хурал дөрөвдүгээр сарын 17-ныг хүртэл хойшилсон байна. Шүүх хуралдааныг хойшлуулсан шалтгаан нь хэргийн холбогдогчдын нэг УИХ-ын гишүүн Х.Ганхуяг гадаадад яваа, мөн шүүгдэгчдийн өмгөөлөгч нарын зарим нь шүүх хуралдаан давхацсан гэдэг үндэслэлээр хойшлуулжээ. 

Түүнчлэн шүүх хуралдааны тов гарсны дараа нийгэмд дуулиан болж өндөр авсан, маш олон хүний эрх ашиг, ашиг сонирхол /ялангуяа улс төрийн хүрээнд/ хөндөгдөж байгаа ийм хэргийн шүүх хуралдааныг нээлттэй явуулах ёстой гэдэг шаардлагыг олон нийтийн зүгээс тавьж байсан. Хэргийн холбогдогч нар ч гэсэн энэ асуудал дээр зөрчилтэй байгаа.

Тухайлбал, хэргийн зарим холбогдогч нар “хүний хувийн чанартай эмзэг мэдээллийг хэрэгт хавсаргасан байгаа учраас шүүх хуралдааныг хаалттай явуулж өгнө үү” гэж хүсэлт гаргасан юм байна. Шүүгчид мөн “гүйцэтгэх ажлын нууц материал хэрэгт авагдсан учраас шүүх хуралдааныг хаалттай явуулна” гэсэн байсан. Харин хэргийн бусад холбогдогчдын зүгээс өөрийгөө эрүүгийн гэмт хэрэг үйлдээгүй хэмээн үзэж, хилсээр яллагдахаас хамгаалах, шүүхийн хараат бус, нээлттэй, ил тод байдлыг хангахын тулд хуралдааныг нээлттэй явуулахыг хүсч, өмгөөлөгч нар нь шүүхэд хүсэлтээ өгсөн байдаг.

Мөн өчигдөр УИХ-ын нэр бүхий гишүүд “Хөгжлийн банкны хэргээс иргэдийн хүсэн хүлээсэн үр дүн гарахгүй байх вий, улс төрийн нөлөө орох вий гэж болгоомжилж байна. Шүүх хуралдааныг нээлттэй явуулахыг шаардаж байна. Гүйцэтгэх ажиллагаа, хүний хувийн нууцтай холбоотой мэдээллүүдийг хэлэлцэхээс бусад үед шүүх хуралдааныг нээлттэй явуулах ёстой” гэж мэдэгдсэн.

Тэгэхээр шүүх хуралдааныг дахин зарлахаас өмнө энэ асуудлыг эргэж хэлэлцэж магадгүй гэдэг хүлээлт олон нийт, хэргийн холбогдогч нар төдийгүй улс төрийн хүрээнд ч үүсээд байна.   

Б.ЗАЯА