2022 оны хоёрдугаар сарын 24-ны өдөр ОХУ дайн зарлаж, Украин Улсыг эзлэн түрэмгийлж эхлээд нэг жил өнгөрчээ. Дэлхийн олон улсад өрнөсөн дайныг эсэргүүцсэн жагсаалд монгол залуус нэгдэж 55 удаа #NoWar жагсаалыг зохион байгуулсан байна. 

Дайны эсрэг #NoWar иргэдийн хөдөлгөөний залуус #NoWar гэрэл зургийн үзэсгэлэн нээх болсон талаараа мэдэгдэж, өнөөдөр хэвлэлийн бага хурал хийлээ. 

Энэ үеэр "No War" хөдөлгөөний зохицуулагчдын нэг иргэн Б.Цацрал дараах мэдээллийг өглөө. 

Тэрээр "Бид дайныг эсэргүүцсэн энх тайвны төлөөх хөдөлгөөнийг өрнүүлээд нэг жил болж байна. Нийт 55 удаагийн жагсаалыг бид хийсэн байна. Өнөөдөр Монголд сар шинийн баяр тохиож, ах дүүс элгэн садныхаа амар мэндийг мэдэж баярлаж байгаа бол, Украин улсад олон мянган иргэн орон гэргүй болж, эх орноосоо дүрвэсэн байна. 

Дайн эхэлснээс хойш ОХУ-ын ЭСЯ-аас дайны эсрэг үзэл бодлоо илэрхийлсэн иргэдийн "юу бодох", "цахим хуудсандаа ямар мэдээ, мэдээлэл оруулах" зэргийг зааварлаж байсан, Монгол улсын дотоод хэрэгт оролцсон зэрэг маш бүдүүлэг алдаа гаргаж байсан ийм нэг жил өнгөрчээ.

Мөн манай төр засаг, хууль хүчнийхэн дайны эсрэг үзэл бодлоо илэрхийлсэн, эвлэлдэн нэгдсэн иргэдийг шалгаж, хэрэг үүсгэсэн байна. 

Бид мөн элэгт нэгтнүүддээ туслах хөдөлгөөнийг өрнүүлсэн. Монголын төр засаг төвийг сахисан бодлого баримталж байгаа хэмээн тайлбарлаж буй ч өнгөрсөн шөнө ОХУ-аас Украинаас цэргээ гаргахыг шаардсан НҮБ-ын тогтоолд Монгол Улс түтгэлзсэн санал өгсөнд харамсаж байна. Энэ бол хүний эрхээс ухарсан үйлдэл. Төвийг сахисан бодлого биш. Монгол Улсын Засгийн газар ийм байдлаа залруурах хэрэгтэй. Бүх зүйл болж буй мэт иргэдээ төөрөгдүүлэхээ болих хэрэгтэй.

Бид маргаашнаас Монгол улсад дайныг эсэргүүцсэн, энх тайванд уриалсан хөдөлгөөн нэг жилийн хугацаанд юу болж өнгөрсөн бэ, хэрхэн өрнөсөн гэдэг тойм гэрэл зургийн үзэсгэлэн гаргана. Иргэд та бүхнийг урьж байна" гэлээ. 

Харин "No War" хөдөлгөөний зохицуулагчдын нэг иргэн Б.Билгүүн "Өнгөрсөн нэг жилийн хугацаанд ОХУ үнэхээр дайн хийгээд байгаа юм уу гэх мэдээллийн тархи угаалт явагдлаа. Анх бол Монгол Улсад "дайн" гэх үг хориотой болох дөхсөн. Харин одоо ОХУ-ын түрэмгийллийг хүлээн зөвшөөрч байна. Одоо Зөвлөлтийн үзэл суртлын зэвсэг болсон маршал Г.Жуковын хөшөөг буулгахыг шаардаж байна. Ингэж дайныг эсэргүүцэж, энх тайвныг дэмжиж байгаа үйлдлээ харуулах хэрэгтэй. Түүний түүх зохиомол, хуурамч. Мөн Орос ах гэж хэт туйлширсан бусад бүтээлүүдийг ч эргэж харах цаг болсон" гэв.

#NoWar гэрэл зургийн үзэсгэлэн 2023 оны хоёрдугаар сарын 25-наас гуравдугаар сарын 15-ны хооронд олон нийтэд хүрэх юм.