Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцын талаар хянан шалгах үүрэг бүхий түр хорооны Нотлох баримтыг шинжлэн судлах хоёр дахь шатны сонсгол өнөөдөр хоёр дахь өдрөө үргэлжилж байна. 

Энэ удаагийн Нотлох баримтыг шинжлэн судлах сонсголыг “Хөгжлийн банкны эх үүсвэрээр улсын төсвөөс эргэн төлөгдөх нөхцөлтэй, хөрөнгө оруулалтын шинж чанартай төсөл, арга хэмжээнд олгосон зээлийн ашиглалт, зарцуулалт, үр дүн, Хөгжлийн банкны үйл ажиллагаанд эрх бүхий байгууллага, хөндлөнгийн хяналт шалгалтын болон олон улсын аудитын компаниудын дүгнэлт зөвлөмж, өгсөн үүрэг даалгаврын хэрэгжилт, үр дүнгийн байдал, холбогдох гэрчээс мэдүүлэг авах” сэдвийн хүрээнд зохион байгуулж байгаа юм.

Өнөөдөр УИХ-ын гишүүн, Эдийн засгийн хөгжлийн сайд асан Н.Батбаяр Хөгжлийн банкны сонсголд оролцож байна. Тэрээр сонгсголыг удирдаж буй Б.Энхбаяр, Т.Доржханд, Ж.Сүхбаатар нарын асуултад маш оновчтой хариулж, далимд нь эрх баригчдыг чадварлагаар шүүмжилж байсан тул сүүлдээ завсарлага авч, хүчээр сонсголыг зогсоолоо.

Түүнийг Хөгжлийн банкны санхүүжилтийг шийдэлцэж байсны хувьд сонсголд дуудсан юм.

Сонсголын дунд үед УИХ-ын гишүүн Т.Доржханд “Хөгжлийн банкны 2 их наяд 540.2 тэрбум төгрөгийн санхүүжтилтийн 88.9 хувь буюу 2 их наяд 260.4 тэрбум төгрөгийг УИХ, Засгийн газрын тогтоолыг үндэслэн 295 төсөл, арга хэмжээнд олгосон. Ихэнх мөнгөө валют олохгүй ажилд зарцуулчихсан байна” хэмээн асуув.

Сайд асан Н.Батбаяр ”Экспорт дэмжих чиглэлд зарцуулсан мөнгө бага юм шиг харагдаж байж болно. Хэрвээ манай Засгийн газар унаагүй бол Монгол Улс төмөр замтай болчих байсан юм. Гэтэл МАН хоёр удаа 60 гаруй гишүүнтэй гарч ирээд төмөр үам барьсангүй. Мухар зам барьсан, өргөн царигаар барьсан. Өнөөдөр “Нүүрсний хулгай” ярьж байна. Төмөр зам барьчихвал нүүрсний хулгай чинь автоматаар байхгүй болчихно” хэмээн хариулав.

Харин УИХ-ын гишүүн Т.Доржханд “Ажил хийснийг чинь хүлээн зөвшөөрч байгаа ч төсвөөс гадуур мөнгө эргэлдүүлсэн зэргээр макро түвшинд алдаа гаргачихжээ гэж хэлэх болов уу гэж харж байлаа” гэхэд Сайд асан Н.Батбаяр “Би макро түвшинд алдаа гаргаагүй. Гадаад худалдаа нэмэх үзүүлэлттэй болгож чадна гэдгээ бид мэдэж байсан. Одоо ч нэмэх. Гэтэл яагаад ам.долларын ханшаа алдаж байна вэ гэвэл Оюутолгой, Тавантолгойн экспортын орлого орж ирэхгүй байгаатай холбоотой. 2017 онд Оюутолгойн орлогыг Монголын банкуудаар дамжуулахаар болгоход сарын дараа тэр шийдвэрээ цуцалж байсан. Хэрвээ экспортынхоо орлогыг бүгдийг нь эх орондоо авдаг байсан бол ханшаа алдахгүй байсан юм. Тийм болохоор экспортын орлогоо бүгдийг нь олж авдаг нөхцлийг бүрдүүлэх хэрэгтэй” хэмээн хариулав.

Түүнийг ийн үргэлжлүүлэн ярьж байтал Сайд Ж.Сүхбаатар “Таны бие зүгээр үү” хэмээн асуухад Н.Батбаяр “Зүгээр, зүгээр” гэж хариулсан ч “Б.Батбаяр эмчилгээтэй байдаг хүн. Одоо бусдаас нь асуугаад явчих” хэмээн хариултыг нь зогсоосон юм. Мөн түр хорооны гишүүнд түр зуур салхинд гарахыг Н.Батбаярт зөвлөсөн юм.